Два ресторана во Мадрид водат необична битка за престижната титула најстар ресторан во светот. И додека едниот од нив, познатиот Собрино де Ботин, го држи официјалниот Гинисов рекорд со децении, другиот, помалку познатиот Каса Педро, тврди дека е всушност постар, но без потребната документација за да го докаже тоа.
Станува збор за спор што оди подалеку од кулинарските разлики – станува збор за традиција, историја и право на глобално признавање. Гинисовата книга на рекорди признава само ресторани кои можат да потврдат континуирано работење на истата локација под истото име, со јасна и целосна архивска документација. И тука започнува компликацијата…
Ресторанот Собрино де Ботин, носител на Гинисовиот рекорд за најстар ресторан во светот, основан во 1725 година, на само неколку чекори од познатата Плаза Мајор, стана познат по своите печки на дрва и гости како Труман Капоте, Скот Фицџералд, а стана бесмртен благодарение на Ернест Хемингвеј, кој го нарече „еден од најдобрите ресторани во светот“ во својот роман „Сонцето повторно изгрева“.
Ботин ја доби титулата Гинис во 1987 година, а претходно оваа година прослави 300 години континуирано работење.
Во другиот агол се наоѓа Каса Педро, рустична таверна на периферијата на Мадрид која смело тврди дека всушност му припаѓа тронот. Овој ресторан бил домаќин на шпанскиот крал Хуан Карлос I и на сегашниот монарх, кралот Фелипе VI, а сопствениците тврдат дека дури и ја преживеал Војната за шпанското наследство на почетокот на 18 век, што би значело дека е уште постар од Ботин.
„Фрустрирачки е кога велите: „Да, постоиме од 1702 година“, а немате цврсти докази. Кога ќе го погледнете нашето лого, пишува „Каса Педро, од 1702 година“, па рековме: „Добро, ајде да се обидеме да го докажеме тоа“, вели менаџерката и сопственичка од осма генерација, Ирена Гињалес.
Семејството Гињалес ангажирало историчар, а досега се пронајдени документи што потврдуваат дека ресторанот работи од најмалку 1750 година. Ирена сè уште бара докази за да потврди дека Каса Педро всушност датира од 1702 година.
Но, како да докажете дека сте најстариот?
Според портпаролката на Гинисовата книга на рекорди, Кајли Галовеј, правилата се откриваат исклучиво на кандидатите и вклучуваат „обемни докази и документација за континуираното работење на ресторанот низ годините“.
Антонио Гонзалез, сопственик од трета генерација на Ботин, вели дека Гинис барал ресторанот континуирано да работи на истата локација, под истото име. Единствениот прекин на работата беше за време на пандемијата, како што беше случајот со „Каса Педро“.
Поради овој критериум, рестораните што можеби се постари, како што е парискиот „Ле Прокоп“, основан во 1686 година, не се во трка за официјалниот Гинисов рекорд.
И за да биде уште поинтересно, од сенка се појавува трет кандидат, италијанскиот ресторан „Ла Кампана“ во центарот на Рим, кој тврди дека повеќе од 500 години нуди „вкус на автентична римска кујна со додавање на историја“. Неговите сопственици велат дека ја собрале целата потребна документација и наскоро планираат да ја испратат до Гинисовата комисија.
