Исхраната е клучна за одржување на здравјето. „Ако постои една група намирници што треба да ја јадеме повеќе, тоа е зеленчукот“, објаснува диететичарката Шерон Палмер.
Палмер истакнува многубројни причини за зголемување на внесот на зеленчук. „Повеќето експерти се согласуваат дека зеленчукот носи бројни здравствени придобивки, вклучувајќи намален ризик од дебелина, срцеви заболувања и дијабет тип 2“, вели таа. „Овие чудесни намирници се нискокалорични и со малку масти, но богати со растителни влакна, витамини, минерали и фитохемикалии со антиоксидативни и антиинфламаторни својства“, додава.
Кој зеленчук има најголеми здравствени придобивки?
Најдобар избор е лиснатиот зеленчук. „Тој изобилува со витамини, минерали и растителни соединенија“, вели Палмер. „Високиот внес е поврзан со многу придобивки, како заштита на очите и коските, подобрено варење, одржување здрава телесна тежина и намален ризик од рак, срцеви заболувања и когнитивни нарушувања.“
Диететичарката Џерлин Џоунс се согласува со тоа и посебно ги препорачува спанаќот, кељот, раштакот и блитвата. „Тешко е да се издвојат само еден вид бидејќи сите се одличен извор на железо, антиоксиданси, витамин А за здрави очи и калциум за зајакнување на коските“, вели Џоунс.
Брокулата е исто така одличен избор, бидејќи е нискокалорична, а богата со хранливи материи. „Одличен е извор на витамин Ц, кој го зајакнува имунитетот, како и на витамин К и калциум, клучни за здравјето на коските“, објаснува диететичарката Тоби Смитсон.
Диететичарката Мариса Карп додава дека брокулата содржи одлична количина од дневно препорачаната доза на витамин К, важен за коагулација на крвта и здравјето на мозокот. Исто така е богата со влакна кои помагаат во регулирање на шеќерот во крвта и намалување на холестеролот, пишува HuffPost.
Намирници што треба почесто да ги консумираме
Артичоки
Ова растение е богато со влакна што ја поттикнуваат здравата цревна флора и придонесуваат за здравје на срцето со намалување на холестеролот и крвниот притисок, вели Карп.
Грашок
Содржи висок процент на растителни протеини и е богат со влакна, што придонесува за подобро варење и подолгa ситост. Исто така содржи сапонини, растителни соединенија кои можат да го намалат оксидативниот стрес и ризикот од рак.
Ротквици
Кога се варат или печат, ја губат горчината и добиваат поблаг вкус. Смитсон препорачува да се користат и стеблата и листовите, бидејќи содржат повеќе протеини, калциум, витамин Ц и антиоксиданси од самиот корен.
Сладок компир (батат)
Бататот е богат со витамин А, кој го поддржува видот и спречува дегенеративни промени во окото. Содржи и растителни влакна, калиум и двојно повеќе витамин Ц отколку обичниот компир.
Домат
Богат е со антиоксиданси како ликопен, бета-каротен и флавоноиди. Ликопенот го намалува ризикот од срцеви заболувања и рак, додека бета-каротенот го чува здравјето на очите. Варените домати имаат дури и поголема корист од ликопенот отколку свежите.
