Научници открија високозаразен вирус кај грбави китови над Арктичкиот круг, користејќи дронови за собирање примероци од нивниот издишан млаз. Ова претставува значаен напредок во следењето на здравјето на морските цицачи и нуди можно објаснување за причините за масовното насукување на китови и делфини на бреговите ширум светот.
Кај китовите, отворите за дишење функционираат како своеобразни млазници. Тие се наоѓаат на горниот дел од главата, што им овозможува да дишат без целосно да излезат на површината. Доволно е само горниот дел од главата со дишниот отвор да се појави над водата. При издишување, влагата од издишаниот воздух се кондензира и создава таканаречен млаз.
Истражувачите управувале дронови низ капките од тие млазови – познати и како „удари“ – кои китовите ги испуштаат при изронување, пренесува BBC.
„Земањето примероци од овие ‘удари’ овозможува следење на патогени кај живи китови, без да се предизвика стрес или повреда на животните“, изјави професорот Тери Досон од Кингс колеџот во Лондон.
Анализата за првпат потврдила циркулација на китовски морбиливирус – смртоносен и исклучително заразен вирус кој се поврзува со масовни насукувања на китови и делфини низ целиот свет.
Вирусот лесно се пренесува меѓу различни видови и се шири преку океаните, претставувајќи сериозна закана за морските цицачи.
Според научниците, ова откритие овозможува порано откривање и следење на смртоносни болести во океаните, пред тие да предизвикаат масовни заболувања.
„Во иднина, приоритет е да се продолжи со користење на овие методи за долгорочен надзор, за подобро да разбереме како новите стрес-фактори ќе го обликуваат здравјето на китовите во наредните години“, изјави Хелена Коста од Универзитетот Норд во Норвешка.
Студијата е спроведена во соработка меѓу Кингс колеџот во Лондон, Кралската школа за ветеринарни студии во Велика Британија и Универзитетот Норд во Норвешка, а е објавена во научното списание „BMC Veterinary Research“.
