Иако одамна е познато дека внатрешното јадро расте додека се лади и кристализира течното надворешно јадро околу него, научниците не можеа со сигурност да објаснат како започнал процесот на замрзнување. Студијата, објавена во Nature Communications, користи компјутерски симулации за да го истражи однесувањето на различни елементи под условите на внатрешното јадро.
Истражувачите од Оксфорд, Лидс и Универзитетскиот колеџ во Лондон откриле дека јаглеродот е клучен за поттикнување на процесот на кристализација, што доведува до формирање на внатрешното јадро. За разлика од тоа, силициумот и сулфурот, за кои долго се сметаше дека се дел од составот на јадрото, всушност го забавуваат процесот на смрзнување.
„Нашите симулации покажаа дека ако околу 3,8% од масата на внатрешното јадро се состои од јаглерод, тогаш може да се постигне суперладење од 266 °C – услов што го објаснува формирањето на денешното јадро“, изјави д-р Ендру Вокер од Универзитетот Оксфорд.
Симулациите вклучувале моделирање на 100.000 атоми при екстремни температури и притисоци, како оние во внатрешното јадро. Тоа овозможило детално следење на првите фази на кристализација – процесот познат како нуклеација.
Овие откритија не само што го менуваат разбирањето за хемискиот состав на внатрешното јадро, туку и укажуваат дека без јаглеродот, денес веројатно не би постоело цврсто внатрешно јадро, а со тоа и магнетното поле кое ја штити Земјата од соларната радијација.
Научниот тим заклучува дека прецизниот хемиски состав бил од суштинско значење за почетокот на кристализацијата, без потреба од надворешни “нуклеациони семиња”, што е целосно различно од, на пример, процесите на замрзнување на вода.
Извор: Index.hr
