Според податоците на германскиот Институт Кил, во јули и август западната воена поддршка за Киев опаднала за 43% во споредба со првата половина од годината. Овој пад се случува и покрај новата шема за набавки на американско оружје наречена „Prioritised Ukraine Requirements List“ (PURL), во која шест земји веќе инвестирале околу 2 милијарди долари.
Данска, Холандија, Норвешка и Шведска активно купуваат американски оружја за Украина, но Италија и Шпанија заостануваат во споредба со другите членки. „Некои земји постојано даваат помалку отколку што треба. Ако Украина падне, трошоците за одбрана ќе надминат 5% од БДП,“ предупреди висок дипломат на НАТО кој зборуваше анонимно.
Во последните недели, серија руски дронови и воени авиони го нарушија воздушниот простор на Полска и Естонија, што поттикна страв дека Москва ги тестира одбранбените реакции на НАТО.
Во исто време, руската армија започна нова зимска кампања против украинската енергетска мрежа, со цел да ја остави земјата без струја и греење во пресрет на студените месеци.
На теренот, Украина бара дополнителни пакети за поддршка – за одбрана на фронтот, заштита на критичната инфраструктура и за одбивање на воздушните напади.
Генералниот секретар на НАТО, Марк Руте, во пресрет на состанокот побара од земјите членки да ги укинат ограничувањата за користење на авионите и воената опрема што ја донирале, за да се зајакне одбраната на источното крило на алијансата.
„Некои национални ограничувања сè уште нè кочат. Тоа нè прави помалку ефикасни,“ изјави Руте.
НАТО во септември воспостави нова воздушна одбранбена операција под името „Eastern Sentry“, откако неколку руски дронови влегоа во полскиот воздушен простор. Ова е една од трите операции за воздушна заштита на источната граница, кои ги покриваат Балтичкото Море и границата меѓу Полска и Украина.
Американскиот генерал Алекс Гринкевич, врховен сојузнички командант на НАТО, оцени дека реакцијата на последните инциденти била „примерна“, но најави ревизија на правилата за ангажман за да се создаде поефикасен „обединет воздушен штит“.
Неколку земји-членки, особено Франција и Италија, се воздржуваат од дополнителни придонеси. Париз смета дека европските пари треба да се вложуваат во европската одбранбена индустрија, а не во американската.
Иако сите 32 земји од алијансата ја поддржуваат Украина во принцип, разликите во темпото и обемот на помошта стануваат сè поочигледни. Украина, пак, на состанокот ќе настојува да ги убеди земјите што сè уште не се приклучиле на PURL да го сторат тоа, а оние што веќе придонесуваат — да ја зголемат својата поддршка.
Додека руските напади врз Украина продолжуваат, НАТО се соочува со испит на единството и политичката волја. Исходот од денешната средба во Брисел ќе покаже дали алијансата успева да го одржи темпото на помошта или ризикува ослабување на фронтот и зголемен притисок на своите источни граници.
Извор: Euronews
