Ново истражување за безбедноста на децата на интернет покажува загрижувачки податоци – секој трет ученик доживува некаков вид насилство на интернет најмалку еднаш месечно.
Во истражувањето учествувале 1.727 ученици од повисоките одделенија на основните училишта, а резултатите покажуваат дека дури 34,2 проценти од нив се соочуваат со навреди, омаловажување или други форми на дигитално насилство.
Дополнително, околу една четвртина од учениците признале дека и самите учествувале во вакво однесување на интернет, што укажува дека ваквите појави стануваат сè почести и постепено се нормализираат во онлајн комуникацијата меѓу младите.
Експертите предупредуваат дека навредите, ширењето гласини, понижувањето и заканите на социјалните мрежи можат да имаат сериозни психолошки последици кај децата и младите, па затоа се нагласува потребата од поголема едукација и превенција.
