Инцидентите започнале околу 21:40 часот, кога кон собраните граѓани биле испалени петарди, топовски удари и стаклени шишиња полни со лед. Неколку лица биле погодени и повредени, со крварења и изгореници. „Донесоа ладилници полни со шишиња лед и практично отворија мини-фронт за напад,“ изјави студент присутен на протестот во Врбас.
И покрај силното полициско присуство, очевидци тврдат дека полицијата не се обидела да го запре насилството, туку останала во улога на физичка бариера меѓу групите. Жандармеријата пристигнала дури околу 23:15 часот, но наместо да интервенира против напаѓачите, започнала да ги потиснува демонстрантите.
Паралелно, слични сцени се одвивале во Бачка Паланка, каде исто така биле гаѓани демонстранти, меѓу кои и деца. На видеа објавени од студентските организации, се тврди дека автобуси на компанијата „Драгиќ турс“ ги превезувале напаѓачите до Врбас.
Напаѓачите скандирале погрдни пароли, користеле зелени ласери за да ја попречуваат работата на новинарските екипи и отворено носеле партиски обележја, знамиња и транспаренти со ликот на претседателот Александар Вучиќ.
„Не сакаме уште еден Пионирски парк во нашата земја,“ изјави Алекса, студент по психологија од Нови Сад, алудирајќи на претходни насилни инциденти во Белград.
Од студентите во блокада на белградските универзитети пристигна остро соопштение со осуда на нападите и „целосното игнорирање на надлежните служби“. „Граѓаните на Врбас и Бачка Топола не се сами,“ порачуваат тие.
До овој момент, Министерството за внатрешни работи на Србија нема официјален одговор за случувањата, иако јавноста бара итна и независна истрага за пропустите во обезбедувањето на јавниот ред и мир.
Овие координирани напади се уште еден алармантен показател за растечката политичка напнатост во Србија, која сè почесто се изразува преку насилство врз мирни демонстранти – и за многумина претставуваат доказ за сериозната ерозија на демократските стандарди и владеењето на правото во земјата.
