Иранскиот министер за наука Хосеин Симаеи Сараф го осуди денешниот напад врз универзитет во Техеран, нарекувајќи го „однесување полошо од луѓето од каменото доба“. Во воздушниот напад сериозно е оштетен центар за истражување на ласери, а Сараф при посетата на погодената локација остро ги критикуваше напаѓачите.
„Непријател без корени во историјата, културата и цивилизацијата се однесува полошо од луѓето од каменото доба“, изјави тој.
Засега не е познато кој стои зад нападот, дали станува збор за сили на Соединетите Американски Држави или Израел, ниту пак зошто истражувачкиот центар бил цел. Инаку, Израел и претходно во повеќе наврати таргетираше ирански научници и истражувачки капацитети поврзани со нуклеарната програма на Иран.
