Украинските поморски дронови „Sea Baby“ извршија нова координирана операција во Црното Море, при што се наведува дека биле погодени и оневозможени два руски нафтени танкери – Kairos и Virat. Двата брода се дел од т.н. „сенковата флота“, мрежа на пловила која со години се користи за прикриен транспорт на руска нафта и заобиколување на западните санкции.
Како што објави The Kyiv Independent, нападот се случил вчера, во близина на турскиот брег. Извор од украинската Служба за безбедност (СБУ) за медиумот потврдил дека операцијата била заеднички изведена со украинската морнарица и дека целта биле бродови со потенцијал да превезат нафта во вредност од речиси 70 милиони долари. Танкерите биле на пат кон руската лука Новоросијск, празни и подготвени за товарење во моментот кога биле погодени.
Истото лице за медиумот изјавило дека дроновите „успешно си ја завршиле задачата“, оценувајќи ја операцијата како „значаен удар врз рускиот транспортен капацитет за нафта“. Украинската страна објави и досега невидени снимки од експлозиите, на кои се гледаат тешки оштетувања на двата танкера во моментот на ударот.
Двата брода одамна се наоѓаат под лупа на меѓународните мониторинг-мрежи поради нивното учество во нетранспарентни рути, користење „флагови погодности“ и сомнителни практики за избегнување на санкции. Според Bloomberg, Kairos се враќал од Индија по испорака на уралска сурова нафта, додека Virat – кој веќе е санкциониран од САД и ЕУ – поголемиот дел од годината минал закотвен во западниот дел на Црното Море, откако во јануари бил додаден на американската листа на санкционирани пловила.
Операцијата доаѓа во момент кога Киев го интензивира притисокот врз руската инфраструктура за транспорт на енергенси, таргетирајќи ја мрежата што Москва ја користи за да ги ублажи последиците од санкциите и да го одржи извозот на нафта. Украинските „Sea Baby“ дронови и досега се покажаа како едни од најуспешните средства во таквите операции, а новите снимки дополнително ја демонстрираат прецизноста и тактичкиот капацитет на украинските сили на море.
