Многупати кога се зборува за возење тоа значи многу гужви, работа на пат и други непријатности но во некои делови од светот патувањето со автомобил претставува вистински ризик по живот. Постојат патишта каде што една грешка може да има сериозни последици, особено на тесни планински превои без заштитни огради и со непредвидливи услови.
Меѓу најопасните патишта се издвојува патот Кијлонг–Киштвар во Индија, долг повеќе од 200 километри, каде што возачите се движат покрај длабоки бездни без никаква заштита. Чести се одрони и нагли временски промени, што дополнително ја зголемува опасноста. Слично ризичен е и преминот Зоџила во Хималаите, кој често е затворен поради снег и мраз, а на некои делници има место само за едно возило.
На Балканот, Ибарска магистрала е позната како „црна магистрала“ поради големиот број сообраќајни несреќи. Долгите правци кои завршуваат со остри кривини, како и ноќното возење и непочитувањето на правилата, ја прават една од најризичните патни рути во Европа.
Во Романија, Трансфагарашан важи за еден од најубавите, но и најпредизвикувачки патишта. Се издигнува на над 2.000 метри надморска височина и е полн со серпентини, тунели и нагли промени на висината. Дополнителен ризик претставуваат стада овци кои често се движат по коловозот.
Патот Скиперс Кенион во Нов Зеланд е ископан директно во карпи и е толку тесен што на многу места дозволува само еднонасочно движење. Во САД, Далтон автопатот на Алјаска е познат по екстремните временски услови, снегот и изолираната околина, додека во Пакистан патот до Fairy Meadows се смета за еден од најстрашните поради теснината и отсуството на огради.
Особено опасен е и патот Јунгас во Боливија, познат како „Патот на смртта“, каде што некогаш годишно се бележеле стотици жртви. Во Кина, автопатот Сечуан–Тибет минува низ високи планини, изложен на лавини, одрони и долги сообраќајни застои, што го прави вистински тест за секој возач.
И покрај ризиците, овие патишта привлекуваат авантуристи од целиот свет поради нивните спектакуларни пејзажи. Сепак, тие остануваат потсетник дека безбедноста на патиштата не е секогаш загарантирана и дека внимателното возење е клучно, особено во екстремни услови.
