Руската Камчатка е погодена од ретка снежна бура каква што не е забележана последните 146 години. Во главниот град Петропавловск-Камчатски е прогласено вонредно состојба, откако силен пацифички циклон донесе огромни количини на снег. Улиците, дворовите и целите населби се затрупани под метри снег, а снежните наноси достигнуваат до четвртиот спрат на зградите.
Градските служби работат без престан, но снегот е толку густ што многумина не можат да ги отворат влезните врати. Граѓаните излегуваат низ прозорците, а екипите за итни интервенции копаат тунели за да стигнат до повозрасни лица заробени во домовите.
Снимки како од ледено доба
Сателитските и дрон снимките покажуваат автомобили затрупани до покрив, автобуси кои не можат да се разликуваат и цели улици претворени во бели ровови. Снегот се лепи на фасади, влезови и прозорци на повисоките спратови.
Метеоролозите потврдуваат дека за само неколку дена регионот добил количина снег која нормално би паднала за повеќе месеци.
За жал, екстремните услови веќе однеле човечки животи – двајца мажи, на 60 и 63 години, загинале кога масивни ледени плочи и снег се лизнале од крововите на зградите.
Вонредни мерки и прекинати активности
Во Петропавловск се затворени училиштата, јавниот превоз е суспендиран, а многу продавници се соочуваат со проблеми со снабдувањето. Летовите се одложени или откажани, а патиштата кон помалите населби се целосно одсечени.
На некои делници снегот е толку висок што специјалните машини не можат да поминат, па се работи рачно, сектор по сектор.
Причини за екстремните снежни услови
Стручњаците објаснуваат дека Камчатка се наоѓа под влијание на силни пацифички циклони кои носат огромни количини на влага. Кога оваа влага ќе се сретне со екстремно студен воздух и планинскиот терен на Камчатка, се создава ретко виден обем на снежни врнежи.
Климатските промени дополнително ги влошуваат условите – потоплите океани носат повеќе влага, што значи почести екстремни снежни епизоди во веќе студените региони.
Прогноза и последици
Додека регионoт полека се пробива низ наноси кои достигнуваат висина на четврти спрат, локалните власти предупредуваат дека опоравокот ќе трае долго. Оваа зима ќе остане запаметена како една од најтешките во историјата на Камчатка и можеби претставува само најавата за слични екстремни настани во иднина.
