На серијата културни настани „Простор за разговор“, организирани од ХЕРА – Асоцијација за здравствена едукација и истражување во соработка со Интерарт културниот центар, во изминатите 10 дена учествуваа над 350 млади од Куманово, Штип, Велес, Битола, Охрид и Струга.
Целта беше преку уметност, танц, театар и филм сплотени во еден перформанс изведен од танчерите на Скопје танцовиот театар, да се зајакне чувството на припадност кон заедницата која е основата за создавање на инклузивно општество во кое секој може да го постигне својот потенцијал.
„Простор за разговор“ се состои од краток филм и танцов перформанс, кои претставуваат уметничка рефлексија на темата со вклученост на социолози, активисти и психолози, кои говереа за тоа каде се младите и што треба понатаму да направиме во однос на социјалната положба и родовата еднаквост.
„Без ограничувања и задршки отворено говоревме за родовата еднаквост во шест градови во државата. На настаните присуствуваа над 350 млади кои низ културен перформанс ги кажаа своите размислувања за стереотипите, маргинализирањето и родовата еднаквост“ велат од Хера.
Настаните се поддржани од Германија преку Германското друштво за меѓународна соработка (ГИЗ) во рамки на регионалниот проект за социјално вклучување на ранливи групи во Западен Балкан, како и од Фондацијата Фридрих Еберт.
