На денешен ден во 1992 година започна војната во Сараево, кога беа убиени првите жртви на конфликтот, Суада Дилберовиќ и Олга Суичиќ. Двете жени учествувале во масовни антивоени протести во главниот град на Босна и Херцеговина, обидувајќи се да спречат ескалација на политичката криза која ја зафати поранешна Југославија.
Тие биле убиени на мостот кој денес го носи нивното име, додека биле изложени на оган од позиции контролирани од паравоени формации во тогаш веќе заострената безбедносна ситуација во градот.
Истовремено, истиот ден започнале и напади врз клучни објекти во Сараево, што во следните денови довело до целосна блокада на градот. До 6 април, Сараево практично било опколено, со прекинати снабдувања со храна, вода и електрична енергија.
Опсадата на градот траеше речиси четири години и се смета за една од најдолгите во модерната историја, со илјадници цивилни жртви, меѓу кои и голем број деца.
За време на опсадата, градот беше постојано изложен на артилериски и снајперски напади, а жителите преживувале во екстремно тешки услови. Во обид да се одржи животот во опколениот град, бил изграден и т.н. „Тунел на спасот“ под аеродромот, кој служел за снабдување со храна, лекови и евакуација на ранети.
Конфликтот заврши по меѓународна интервенција и потпишувањето на Дејтонскиот мировен договор во 1995 година, со што формално завршила војната во Босна и Херцеговина.
