Сите медиуми кои делуваат под системот на UM во Србија, заедно со регионалните редакции на телевизијата N1, поднеле иницијатива за откуп и финансиско раздвојување од „Јунајтед Група“ – компанијата што досега беше нивен главен сопственик.
Според официјалното соопштение, иницијативата е резултат на зголемени тензии во медиумската сфера, како и на потребата за поголема транспарентност и независност на новинарските редакции. Медиумите бараат да се воспостави нов модел на сопственост кој би овозможил полнa уредувачка автономија, заснована на јавен интерес и професионални стандарди.
Изворите блиски до процесот наведуваат дека главната мотивација за барањето за откуп е да се избегне политички и економски притисок, како и можните ограничувања во известувањето за чувствителни теми од јавен интерес.
Телевизијата N1, која има значајно присуство во Србија, Босна и Херцеговина, Хрватска и Црна Гора, ја потврди иницијативата, нагласувајќи дека таа претставува „природен чекор во развојот на независното новинарство во регионот“.
Во реакцијата на медиумите стои дека целта е создавање ново партнерство со доверливи инвеститори и фондации кои ќе гарантираат независно работење и одржлив бизнис модел. Според нив, тоа е одговор на се поголемата концентрација на медиумската моќ во рацете на неколку големи корпорации.
Од „Јунајтед Група“ засега нема официјален коментар, но неофицијално се дознава дека компанијата е отворена за разговори и дека ќе ја разгледа иницијативата во наредниот период, со цел да се обезбеди фер и законски усогласен процес на продажба.
Аналитичарите предупредуваат дека овој потег може да означи најголемата промена во медиумската сопственост во регионот во последната деценија, со потенцијално силно влијание врз медиумскиот плурализам и динамиката на регионалните пазари.
