На настанот учествуваа 30 млади ентузијасти, инспирирани да направат промена и подготвени да дадат свој придонес во климатските преговори. Конференцијата претставува значаен чекор кон вклучување на младите во процесите на климатска акција, како на локално, така и на глобално ниво.
Преку серија презентации и интерактивни дискусии, експерти од УНДП ги споделија своите знаења и искуства на неколку клучни теми:
- Учество на младите во климатските процеси на Обединетите нации
- Врската меѓу климатските акции и намалувањето на ризици од катастрофи
- Битката против аерозагадувањето во македонските градови: Кавадарци, Гостивар, Струга, Куманово и Струмица
- Вклученоста на младите на локално, национално и глобално ниво
Анкица Соколиќ, една од организаторките и членка на регионалната младинска мрежа за климатски промени на УНДП, сподели инспиративно сведоштво за своето учество на КОП29:
„Бев фасцинирана од тоа колку младите од другите региони се подготвени, информирани и вклучени во климатските преговори од страна на своите држави. Ова ме натера да се запрашам – што недостасува кај нас? Така се роди идејата за организирање на првата Локална младинска конференција во Северна Македонија.“
Конференцијата ја организираше младинската организација Kolektiv Z, со одобрување од YOUNGO – официјалното тело на млади во рамките на климатските процеси на ОН. Ставовите и препораките што ги формулираа младите учесници ќе бидат претставени на следната глобална конференција за клима – COP30, што ќе се одржи во ноември 2025 година.
Оваа конференција не е само настан – таа е движење што го отвора патот за младите да бидат вистински партнери во климатската акција.
