Единствениот гол на мечот го постигна Леон Гргиќ во 53-тата минута, со што Хрватска ја симна Украина од првото место во групата.
Избраниците на Ивица Олиќ започнаа агресивно и беа подобар противник во првиот дел. Украина настапи без неколку клучни играчи кои претходно учествуваа на Светското првенство за играчи до 20 години, што Хрватите умешно го искористија за да создадат повеќе опасни шанси.
Адриано Јагушиќ имаше две одлични можности, а во 23-тата минута по додавање од Лука Врбанчиќ, Ловро Звонарак му ја намести топката на Јагушиќ кој шутираше покрај голот. Неколку минути подоцна, Јагушиќ проба со удар со глава, но украинскиот голман Назар Домчак одбрани.
До крајот на полувремето, Хрватите пропуштија уште неколку прилики преку Тео Баришиќ и Леон Гргиќ, додека Украинците беа нервозни и добија два жолти картона.
На почетокот од второто полувреме, Лука Вушковиќ изведе слободен удар и ја погоди стативата, а топката се одби право на ногата на Гргиќ, кој рутински ја погоди празната мрежа за водство од 1:0. Тоа беше неговиот прв гол за младата репрезентација на Хрватска, во само неговиот втор настап.
Украина се обиде да израмни, но голманот Тони Силиќ со неколку блескави интервенции и една вратница ја зачува победата на својата екипа.
По овој резултат, Турција води во групата со 5 бода, додека Хрватска и Украина имаат по 4, но Хрватите имаат еден натпревар помалку.
Хрватска со оваа победа останува во игра за првото место и директен пласман на Европското првенство 2027 година.
Извор: Index.hr
