Западните трупи распоредени во Украина како дел од безбедносните гаранции по прекинот на огнот би можеле да добијат мандат да одговорат воено на идните руски напади, изјави во вторник германскиот канцелар Фридрих Мерц. Во интервју за телевизискиот канал ZDF, Мерц објасни дека меѓународните сили ќе ја обезбедуваат демилитаризираната зона и активно ќе дејствуваат против кршењата на договорот, пишува Киев Индепендент .
„Ќе обезбедиме демилитаризирана зона меѓу завојуваните страни и, поточно, ќе дејствуваме и против соодветните руски прекршувања и напади“, рече Мерц.
Гаранции во стилот на НАТО
Неговата изјава доаѓа во време кога САД и европските сојузници размислуваат да му понудат на Киев безбедносни гаранции слични на оние според Член 5 на НАТО, како дел од идниот мировен договор со Русија.
„Фактот што Американците презедоа таква обврска, имено да ја заштитат Украина во случај на прекин на огнот како да е територија на НАТО, мислам дека тоа е извонредна нова позиција за САД“, истакна Мерц.
Според предлогот од шест точки што неодамна го презентираа европските партнери, повоените гаранции би вклучувале распоредување на мултинационални сили во Украина. Овие сили, предводени од Европа и поддржани од САД, би биле задолжени за зајакнување на украинската војска и помагање во обезбедувањето на воздушниот и поморскиот простор на земјата.
Франција и Обединетото Кралство веќе изразија подготвеност да учествуваат во таканаречената „Коалиција на волјата“. Од друга страна, германскиот министер за одбрана Борис Писториус беше попретпазлив, наведувајќи дека клучните прашања за задачите на овие сили сè уште не се решени.
