„Повеќе нема ограничувања на дострелот на оружјето испорачано во Украина. Ниту од Британците, ниту од Французите, ниту од нас, ниту од Американците“, изјави Мерц за германскиот јавен радиодифузен сервис WDR во Берлин.
Ова, како што објасни, значи дека Украина сега може да се брани и со напади врз руски воени позиции, со одредени исклучоци, што досега не ѝ беше дозволено.
„Сега може да го стори тоа“, рече Мерц, кој ја презеде функцијата на почетокот на мај.
Канцеларот не прецизираше дали укинувањето на ограничувањата на дострелот ќе се однесува и на идните испораки на германско оружје за Украина, особено во однос на ракетите со долг дострел „Таурус“.
Во времето на претходниот канцелар, социјалдемократот Олаф Шолц, Германија – вториот најголем снабдувач на воена опрема за Украина – одбиваше да испорача ракети „Таурус“ поради страв од ескалација на конфликтот со Русија.
Пред да ја преземе функцијата, Мерц јавно ја поддржуваше испораката на овие ракети со дострел од над 500 километри, кои можат да погодат цели длабоко на руска територија. Подоцна, сепак, тој стана повоздржан, истакнувајќи дека, од стратешки причини и за да не ја информира Москва, повеќе нема да коментира конкретно за испораките на оружје од страна на Германија.
Досега Германија ѝ испорачуваше на Украина оружје со дострел до околу 70 километри.
Мерц истакна дека сојузниците на Германија ќе направат сè што е во нивна моќ за да ја продолжат воената поддршка на Украина.
Кремљ ја оцени најавата на Мерц дека западните сојузници ќе ги укинат ограничувањата за дострелот на испорачаното оружје како „прилично опасна“.
„Ако овие одлуки навистина се донесени, тие се апсолутно спротивни на нашите напори за пронаоѓање политичко решение (…) и затоа претставуваат прилично опасна одлука“, изјави портпаролот на рускиот претседател, Дмитриј Песков, во видео емисија пренесена од руските медиуми.
Извор: N1info.rs
