Илјадници луѓе се собраа во јужниот ирански град Минаб на масовен погреб на најмалку 168 девојчиња и 14 наставници кои, според иранските државни медиуми, загинале во американско-израелски напад врз основно училиште во саботата.
Дел од присутните носеле фотографии од убиените деца, меѓу кои и девојчиња на возраст од само седум години. Снимките и фотографиите од погребот прикажуваат мали ковчези покриени со иранското знаме, додека насобраните граѓани изговараат молитви.
Според податоците на Иранскиот Црвен полумесец, во нападите низ земјата досега загинале најмалку 780 лица во 153 окрузи, но се објавени малку детали за жртвите.
Иранскиот министер за надворешни работи Абас Арагчи на социјалната мрежа X ги обвини САД и Израел за смртта на децата, објавувајќи фотографија од свежо ископани гробови.
„Ова се гробовите што се копаат за повеќе од 160 невини млади девојчиња убиени во американско-израелското бомбардирање на основно училиште“, напиша тој.
Од друга страна, американскиот државен секретар Марко Рубио изјави дека САД „не би намерно таргетирале училиште“ и дека доколку станува збор за американски напад, Министерството за одбрана би спровело истрага.
Во меѓувреме, Израел продолжува со интензивирање на нападите врз цели во Иран.
Настанот дополнително ги зголемува тензиите во веќе ескалираниот конфликт, додека меѓународната заедница бара разјаснување на околностите и независна истрага за нападот.
