Ескалацијата на безбедносната состојба на Блискиот Исток ги активираше македонските институции. Според Министерството за надворешни работи и надворешна трговија, повеќе од 400 македонски државјани побарале информации за евакуација, додека околу 30 изразиле подготвеност веднаш да ја напуштат земјата во која престојуваат.
Со сите пријавени лица се одржува континуирана комуникација, а дипломатско-конзуларните претставништва се во координација со локалните власти и пријателските земји за евентуална организирана евакуација.
Евакуација преку Саудиска Арабија
Амбасадата во Абу Даби соопшти дека се разгледува можност македонските граѓани од Обединетите Арапски Емирати да бидат евакуирани преку копнен премин во Саудиска Арабија, а од таму со авионски летови.
Транспортот би се одвивал со автобуси и би траел од 13 до 15 часа. Саудиските власти би издале хуманитарни визи врз основа на доставен список од Амбасадата и МНР.
За пријава се достапни дежурните телефони и контакт-мејлови на дипломатските претставништва.
Формиран кризен штаб
Министерството формираше кризен штаб кој работи 24 часа и ја следи состојбата. Граѓаните во погодените подрачја се повикуваат да ги почитуваат насоките на локалните безбедносни органи и да ги одложат непотребните патувања.
Во меѓувреме, претседателката Гордана Сиљановска-Давкова по седницата на Советот за безбедност изјави дека состојбата во Македонија е стабилна и дека нема закана по националната безбедност.
Ескалацијата во регионот доведе до затворање на воздушни простори и пренасочување летови, а можностите за евакуација ќе зависат од понатамошниот развој на настаните.
