Денеска Македонија решава кој ќе ги води нејзините градови и општини во следните четири години. Над 1,8 милиони граѓани имаат право на глас на осмите локални избори од независноста, кои се одржуваат во сите 80 општини и во Град Скопје.
Избирачките места се отворени од 07:00 до 19:00 часот, а гласањето се одвива на повеќе од 3.400 локации низ земјата. Веднаш по затворањето на гласачките кутии започнува броењето на гласовите, а првичните неофицијални резултати се очекуваат вечерва.
На овие избори ќе се одлучува кој ќе ги води општините, кој ќе ги состави локалните совети, но и каква ќе биде динамиката на урбаниот развој, јавните услуги и инфраструктурата во следните години. Иако локални по карактер, овие избори често се читаат и како политички барометар на поширокиот однос на силите во државата.
Кампањата која им претходеше на изборите беше оценета како мирна, без поголеми инциденти. Денешното гласање го следат и домашни и меѓународни набљудувачи, кои ќе ја оценуваат регуларноста и транспарентноста на процесот.
Буџетот за спроведување на изборите изнесува околу 9,76 милиони евра, од кои најголемиот дел се наменети за медиумско претставување и платено рекламирање.
Посебен фокус денес е насочен кон Скопје и поголемите градови, каде што се очекува најголема неизвесност и каде што резултатите можат да ја променат политичката слика на земјата.
Граѓаните се повикани денес да го искористат своето демократско право и да одлучат кој ќе ја води нивната локална заедница. Ливчето што ќе го фрлат во кутијата ќе биде нивниот глас за тоа каков град сакаат да живеат утре.
