Болницата претходно користела конвенционален систем за климатизација, но сега тоа го прави со помош на 27 резервоари во кои се замрзнува вода.
Оваа врста на складирање – позната како „ледени батерии“ – се инсталира во згради во САД, бидејќи овие системи го ладеат воздухот без да испуштаат гасови што придонесуваат за глобалното затоплување. Тие ги намалуваат потребите за електрична енергија, како и оптоварувањето на електричната мрежа, што е особено важно во време на зголемена побарувачка за струја.
„Трејн Технолоџиз“, компанија која произведува опрема за греење и ладење, вели дека во последните години забележале растечка побарувачка за оваа нова технологија. Нивните „ледени батерии“ најчесто се користат во училишта, комерцијални и јавни згради.
„Ностромо Енерџи“, друга компанија која произведува „ледени батерии“, се обидува да најде клиенти меѓу енергетски интензивните центри за податоци, кои имаат високи барања за ладење.
Помалите системи за домаќинства ги произведуваат други компании како што е „Ајс Енерџи“.
Технологијата варира од производител до производител, но основниот концепт е ист: ноќе, кога електричната енергија е најевтина, водата се замрзнува, а следниот ден, кога ледот се топи, се користи за ладење на зградата. Ледот ја лади водата која циркулира низ цевките во зградата, апсорбирајќи ја топлината од просториите и ладејќи ги.
Класичните компоненти на клима-уредите се задржуваат или се намалуваат кога се додаваат „ледените батерии“.
Во првата година по инсталирањето на системот „ледени батерии“ во 2018 година, сметките за електрична енергија на Болницата Нортон Одубон биле намалени за 278.000 долари. Болницата проценува дека од тогаш заштедила речиси четири милиони долари.
Извор: N1info.rs
