Градот Скопје ќе инвестира 30 милиони денари за значително проширување на капацитетите на ЈП „Лајка“, со цел системско и долгорочно решавање на проблемот со бездомните кучиња во главниот град. Ова денеска го најави градоначалникот Орце Ѓорѓиевски.
Според него, по преземањето на функцијата е прекината практиката јавното претпријатие да се користи за партиски вработувања, а фокусот е ставен на воведување хумани услови и вистинска грижа за животните.
– Со години проблемот со бездомните кучиња се туркаше под тепих. Последиците ги трпеа и граѓаните и самите животни. Денес започнуваме нов, сериозен и одговорен пристап – истакна Ѓорѓиевски.
Инвестицијата, како што појасни, ќе овозможи создавање современи услови за згрижување, што треба да донесе видливи и долгорочни резултати во намалување на бројот на бездомни животни.
Градоначалникот најави и дека Скопје нема да дозволи да стане „депонија за туѓи проблеми“, алудирајќи на носењето бездомни кучиња од други градови.
– Со воведувањето на системот „Сејф сити“, сите кои несовесно носат животни во Скопје ќе бидат откриени и санкционирани. Ред мора да има – и заради безбедноста на граѓаните и заради заштитата на животните – нагласи тој.
Ѓорѓиевски упати апел до граѓаните активно да соработуваат со институциите и да пријавуваат случаи на напуштање или незаконско носење животни.
– Само со заедничка акција можеме да изградиме систем што функционира и да обезбедиме достоинствен третман за бездомните кучиња – додаде градоначалникот.
