Кубанските власти започнале разговори со американската влада, изјави во петокот претседателот на Куба, Мигел Дијаз-Канел, во услови на сериозна економска криза на карипскиот остров и зголемен притисок од администрацијата на американскиот претседател Доналд Трамп.
„Целта на овие разговори беше преку дијалог да се најдат решенија за билатералните разлики што постојат меѓу двете нации“, изјави Дијаз-Канел во видео обраќање емитувано на државната телевизија, непосредно пред да се обрати на кубанските медиуми.
Обраќањето беше најавено како продолжение на настаните од 5 февруари, кога Дијаз-Канел предупреди дека Куба се приближува до ситуација што може да бара „екстремни мерки“, поради длабоката економска криза, честите прекини на електрична енергија и недостигот од гориво. Состојбата дополнително се влошила по мерките на Трамп, кој воведе нафтена блокада кон островот.
Дијаз-Канел изјави дека од кубанска страна разговорите ги водел заедно со поранешниот претседател Раул Кастро и други високи функционери на Комунистичката партија и владата. Тој не откри кои претставници учествувале од страна на Соединетите Американски Држави.
Трамп во повеќе наврати изјави дека САД веќе водат разговори на високо ниво со кубански претставници. Досега, кубанската влада негираше дека се одржуваат официјални средби, но не ги демантираше извештаите за неформални разговори зад сцената со Раул Гиљермо Родригез Кастро – внук на 94-годишниот Раул Кастро, кој и понатаму има значително политичко влијание.
Родригез Кастро се наоѓал зад Дијаз-Канел во видеото, меѓу функционерите на Комунистичката партија прикажани на снимката.
Притисок врз Куба по прекинот на испораките на нафта
Откако Соединетите Држави во јануари го притиснаа венецуелскиот претседател Николас Мадуро – еден од најважните сојузници и поддржувачи на Куба – администрацијата на Трамп ги прекина испораките на венецуелска нафта кон островот.
Истовремено, Трамп се закани со воведување царини за секоја земја што ќе продава нафта на Куба.
Во последните недели американскиот претседател даде повеќе изјави во кои тврдеше дека Куба е на работ на економски колапс или дека се обидува да постигне договор со Соединетите Држави.
Во понеделникот Трамп изјави дека Куба може да биде предмет на „пријателско преземање“, а потоа додаде: „Можеби тоа и нема да биде пријателско преземање“.
