Франција и Канада денеска официјално отвораат конзулати на Гренланд, во главниот град Нуук, со што го продлабочуваат своето дипломатско и безбедносно присуство на Арктикот. Потегот доаѓа во период на зголемени геополитички тензии, откако американскиот претседател Доналд Трамп јавно изрази интерес за преземање контрола врз овој стратешки важен остров.
Отворањето на конзулати во Гренланд се толкува како јасна поддршка за суверенитетот на Гренланд, кој е полуавтономна територија во состав на Данска, и како сигнал за зајакнување на меѓународната соработка во арктичкиот регион.
Франција станува првата земја од Европската Унија што отвора конзулат на Гренланд. Француското Министерство за надворешни работи порача дека Париз останува посветен на почитување на територијалниот интегритет на Кралството Данска, додека претседателот Емануел Макрон уште минатата година ја најави оваа дипломатска иницијатива.
Канада, пак, најави и засилување на својата воена и безбедносна присутност на Арктикот. Канадската министерка за надворешни работи ќе оствари средби со дански и гренландски претставници, при што фокусот ќе биде ставен на арктичката безбедност и регионалната стабилност.
