Рекорден број новинари се убиени низ целиот свет минатата година, извести Комитетот за заштита на новинарите (CPJ), додавајќи дека Израел е одговорен за речиси 70 проценти од смртните случаи.
Најмалку 124 новинари во 18 земји загинале во 2024 година, што оваа година ја прави најсмртоносна за новинарите и медиумските работници од кога било, откако комитетот започна да води евиденција пред повеќе од три децении, соопшти CPJ.
CPJ наведува дека израелските сили убиле 85 новинари и го обвинува Израел за обид да ги задуши истрагите за инцидентите, префрлајќи ја вината на новинарите и игнорирајќи ја својата обврска да ги изведе одговорните пред правдата.
„Војната во Газа е без преседан во своето влијание врз новинарите и покажува сериозно влошување на глобалните норми за заштита на новинарите во зони на конфликти, но тоа не е единственото место каде новинарите се во опасност“, изјави извршната директорка на CPJ, Џоди Гинсберг.
Комитетот исто така соопшти дека истражува уште 20 случаи на убиства за кои верува дека можеби биле насочени напади од израелските сили врз новинари.
