Колумбискиот претседател Густаво Петро го предупреди Доналд Трамп дека ризикува да го „разбуди јагуарот“ откако американскиот лидер посочи дека секоја земја за која верува дека произведува нелегални дроги наменети за САД е ранлива на воен напад. За време на состанокот на кабинетот во вторник, американскиот претседател рече дека воените напади врз копнени цели во Венецуела „ќе започнат многу наскоро“.
Трамп, исто така, предупреди дека секоја земја што произведува наркотици е потенцијална цел, издвојувајќи ја Колумбија, која долго време е близок сојузник на Вашингтон во „војната против дрогата“.
„Загрозувањето на нашиот суверенитет е објава на војна; не ги кршете два века дипломатски односи“, напиша Петро на социјалните мрежи.
Петро, го покани Трамп да ја посети Колумбија – најголемиот производител на кокаин во светот – за да ги види напорите на владата за уништување на лабораториите за дрога.
„Дојдете со мене и ќе ви покажам како тие се уништуваат, по една лабораторија на секои 40 минути“, напиша тој.
Невидена ескалација
Од август, администрацијата на Трамп ги ескалираше тензиите во Јужна Америка на нивоа што не се видени од инвазијата на Панама во 1989 година, под изговор на операции против наркотици. Пентагон распореди значителна поморска сила од речиси 15.000 војници на карипскиот праг на Венецуела и уби повеќе од 80 луѓе во напади врз мали бродови за кои се вели дека превезуваат дрога.
„Ќе почнеме да ги извршуваме тие напади и на копно“, рече Трамп во вторник. „Знаете, копното е многу полесно. И ги знаеме патиштата што ги користат. Знаеме сè за нив. Знаеме каде живеат. Знаеме каде живеат лошите и наскоро ќе го започнеме тоа.“
Кога го прашаа дали напорите ќе бидат ограничени на Венецуела, американскиот претседател рече дека нема.
„Слушнав дека Колумбија, земјата Колумбија, произведува кокаин. Тие имаат фабрики за кокаин, во ред? А потоа ни го продаваат својот кокаин. Многу го цениме тоа. Но да, секој што го прави тоа и го продава во нашата земја е ранлив на напади“, рече тој.
Нарушени односи
Долгогодишни сојузници во „војната против дрогата“, САД и Колумбија, открија дека нивниот однос е затегнат од моментот кога Трамп ја презеде функцијата за својот втор мандат.
Нивниот прв конфликт се случи на почетокот на годината, во јануари, кога Петро – поранешен герилец и прв левичарски претседател на Колумбија – го одби влезот на американските авиони што ги носеа депортираните Колумбијци, инсистирајќи да бидат третирани со достоинство.
Подоцна тој ја поништи таа одлука, но односите се влошија уште повеќе во септември кога, по учеството на Генералното собрание на Обединетите нации, Петро се придружи на пропалестински протест во Њујорк и ги повика американските трупи да не ги почитуваат наредбите на Трамп за „напаѓање на човештвото“.Тој беше и жесток критичар на воздушните напади врз наводни бродови за дрога.
Како одговор, американскиот Стејт департмент ја поништи визата на колумбискиот претседател. Трамп оттогаш го обвинува Петро, дека е „нелегален трговец со дрога“ и дека го поттикнува масовното производство на наркотици, претворајќи го во „главен бизнис на Колумбија“.
Ернандез помилуван
Заканата на Трамп до Колумбија беше упатена само неколку часа подоцна, откако поранешниот претседател на Хондурас осуден за трговија со дрога и корупција, по помилувањето од Трамп, беше ослободен од американски затвор.
Хуан Орландо Ернандез беше осуден на 45 години затвор за наводно создавање „суперавтопат за кокаин“ кон САД. За време на неговиот мандат, Хондурас стана главна транзитна точка за јужноамериканскиот кокаин што се упатува кон север, а исто така и центар за производство на кокаин. Зборувајќи на состанок на кабинетот, Трамп ја опиша истрагата против Ернандез – која започна пред неговиот прв мандат – како „ужасен лов на вештерки на Бајден“.
„Ако имате дилери на дрога во вашата земја и вие сте претседател, не мора нужно да го ставите претседателот во затвор 45 години“, рече тој.
