Прашањето колку алкохол може да испие една здрава личност без да го загрози своето здравје се поставува често, но стручњаците истакнуваат дека одговорот е сложен и индивидуален.
Гастроентерологот проф. д-р Тајана Филипец Канижај од Загреб посочува дека многумина не се свесни во каква состојба е нивниот црн дроб, бидејќи покачените ензими и почетните воспалителни процеси често поминуваат незабележано. Ако се претпостави дека личноста е сосема здрава, се смета дека приближно 1 дл вино, до 3 дл пиво или околу 0,5 мл жесток пијалак дневно би биле количини што не го оптоваруваат значително црниот дроб. Но ова важи само во отсуство на ризични фактори како прекумерна телесна тежина, дијабетес, вирусни хепатити или наследни метаболни нарушувања, бидејќи во тие случаи, според стручњаците, „безбедна количина алкохол практично и не постои“.
Покрај алкохолот, пресудна е и секојдневната исхрана. Нутриционистката Ивона Бродиќ објаснува дека разновидниот внес на сложени јаглехидрати, овошје и зеленчук, здрави масти и антиоксиданси може значително да придонесе за одржување на здрав црн дроб и разградување на масните наслаги. Таа советува внимателно избирање намирници, свежи природни сокови и умерен внес на калорична храна.
Сепак, и Бродиќ и Филипец Канижај се согласуваат дека најважна е мерката. Дури и најздравите намирници и навики можат да станат товар за црниот дроб доколку се практикуваат во преголеми количини. Умереноста, внимателниот избор на исхрана и редовните лекарски проверки остануваат најдобриот начин за зачувување на здравиот црн дроб.
Извор: N1info.rs
