САД и Украина во средата потпишаа договор за пристап до природните ресурси на Украина, соопшти Министерството за финансии на САД. Според Геолошкиот институт на САД, 50 минерали се сметаат за критични (дефицитарни), вклучувајќи ретки земни елементи, никел и литиум. Овие критични минерали се неопходни за индустрии како што се одбраната, високата технологија, воздухопловството и зелената енергија, објави РојтерсСпоред украински податоци, Украина има наоѓалишта на 22 од 34 минерали кои Европската унија ги смета за критични. Тие вклучуваат: индустриски и градежни материјали, феро легури, благородни и обоени метали и некои ретки земни елементи.
Според украинскиот Институт за геологија, Украина поседува ретки земни елементи како: лантан и цериум (се користат во телевизори и осветлување), неодимиум (ветерни турбини и батерии за електрични возила), ербиум и итриум (се користат во нуклеарна енергија и ласери).
Истражување финансирано од ЕУ покажува дека земјата има и резерви на скандиум, но деталите се доверливи.
Светскиот економски форум исто така истакнува дека Украина е потенцијално важен снабдувач со: литиум, берилиум, манган, галиум,циркониум, графит, апатит, флуорит и никел.
Украинската Државна геолошка служба проценува дека Украина има најголеми потврдени резерви на литиум во Европа, околу 500.000 метрички тони.
Резервите на титаниум главно се наоѓаат во северозападниот и централниот дел на Украина, а литиумот во центарот, истокот и југоистокот на земјата.
Украина има и значителни резерви на графит – клучна компонента во батерии за електрични возила и нуклеарни реактори – кои сочинуваат 20% од глобалните ресурси. Наоѓалиштата се во централниот и западниот дел на земјата.
Иако Украина има значителни резерви на јаглен, поголемиот дел од нив сега е под контрола на Русија на окупираната територија.
Според рударски аналитичари и економисти, во Украина во моментов нема комерцијално активни рудници на ретки земни елементи.
Кина останува најголем светски производител на ретки земни елементи и многу други критични минерали.
Што знаеме за договорот?
Двете земји го потпишаа договорот во Вашингтон по неколкумесечни, понекогаш напнати преговори, при што неизвесноста траела до последниот момент. Со договорот се воспоставува заеднички инвестициски фонд за обнова на Украина.
Паралелно, Трамп се обидува да обезбеди мировно решение за тригодишната војна меѓу Русија и Украина.
Министерот за финансии на САД Скот Бесент и првата потпретседателка на украинската влада Јулија Свириденко беа фотографирани при потпишувањето на договорот, објавено од Министерството за финансии на САД на социјалната мрежа X (поранешен Твитер). Тие изјавија дека договорот „јасно го сигнализира ангажманот на администрацијата на Трамп кон слободна, суверена и просперитетна Украина“.
