Британскиот премиер Кир Стармер денеска објави видео–писмо на социјалните мрежи по повод роденденот на неговиот син. Она што започна како лична порака брзо прерасна во порака што ја надминува семејната интимност – стана повик до сите млади кои растат во време на притисоци, дигитална експозиција и сè поголема тишина околу менталното здравје.
Во видеото, Стармер зборува со невообичаена искреност за односот со својот син, за генерациските јазеви, за тоа како технологијата го менува растењето – и за личната одлука да биде поинаков татко од својот. Потсетува дека неговиот однос со сопствениот татко бил далечен, тивок, исполнет со недоизговорени реченици, особено во моментите кога неговата мајка била тешко болна. „Ние никогаш не зборувавме за тоа. Не се познававме,“ вели тој. „Тогаш се зареков дека мојот однос со тебе ќе биде поинаков.“
Тој се осврнува на растењето во 2025-та: како е да бидеш млад во време на постојан надзор, споредби, филтрирани животи и информативни бури. „Знам дека младите се под огромен притисок. Дека им е тешко да зборуваат. Дека прашањата за менталното здравје, машкоста, социјалните медиуми не се едноставни. Но мора да учиме еден од друг,“ порачува Стармер.
Во писмото, премиерот открива и една од причините зошто ја прифатил функцијата – желбата да обезбеди подобра иднина за своите деца и за цела генерација. Признава дека неговата работа бара жртви и од неговото семејство, но дека верува во визијата за свет во кој младите нема да растат со гласот што им шепоти дека не се доволно добри.
Најсилната порака доаѓа на крајот: „Ако треба да оставам само една мисла за тебе – и за секое дете што расте денес – тоа би било ова: не го слушај тој глас. Секој млад човек има што да даде. Секое дете заслужува да ги оствари своите сонови.“
Во време кога младите низ Европа сè почесто зборуваат за анксиозност, притисоци и осаменост, ова писмо надмина формална честитка. Стана потсетник дека политиката не е само економија, туку и грижа за тишините во кои растат генерациите. А Стармер завршува едноставно: „Ти и сестра ти сте мојата гордост и радост. Те сакам. Тато.“
