Инграсја, кој моментално работи како врска меѓу Белата куќа и Министерството за внатрешна безбедност, беше централна фигура во извештај на „Политико“, објавен во понеделник, во кој се наведува дека во приватни пораки самиот се опишувал како лице со „нацистички нарав“ и дека националниот празник во чест на Мартин Лутер Кинг го нарекол „ден за во седмиот круг од пеколот“.
Во објава на платформата Truth Social, Инграсја напиша дека се повлекува од претстојното сослушување пред Сенатот, велејќи дека „во моментов нема доволно републикански гласови“. „Ќе продолжам да му служам на претседателот Трамп и на оваа администрација во духот на „Да ја направиме Америка повторно голема“, додаде тој.
По објавувањето на пораките, неколку водечки републикански сенатори јавно го повикаа Белата куќа да ја повлече номинацијата. Лидерот на мнозинството во Сенатот, Џон Тјун, изјави: „Мислам дека така треба. Тој нема да помине.“ Сенаторот Рон Џонсон од Висконсин исто така рече: „Јас сум против. Ова никогаш не требаше да оди толку далеку.“ До вторник попладне, најмалку пет републикански сенатори изјавиле дека ќе гласаат против потврдата, што практично ја обезвреднило номинацијата.
Адвокатот на Инграсја, Едвард Палцик, тврди дека автентичноста на пораките е сомнителна и дека можеби се создадени со вештачка интелигенција. Тој ги опиша како „самоиронични“ и „сатиричен хумор“, додавајќи дека неговиот клиент е „најмалку налик на нацист“.
Ова не е првпат Инграсја да се најде во центарот на контроверзии. Претходно овој месец, „Политико“ објави дека Министерството за внатрешна безбедност го истражувало поради инцидент во кој наводно ѝ ја откажал хотелската резервација на колешка пред службено патување и ѝ предложил да делат соба. Жената подоцна ја повлекла пријавата, а Инграсја негирал какво било непристојно однесување.
Трамп го номинираше Инграсја во јуни за позицијата што ја предводи агенцијата задолжена за заштита на федералните службеници од одмазда и неправилни практики. Историски, Канцеларијата за специјален совет ја воделе непартиски правници со долгогодишно искуство — додека Инграсја, 30-годишен адвокат, беше примен во адвокатската комора на Њујорк дури минатата година.
Извор: The Guardian
