Канада има намера да ја признае палестинската држава на состанокот на Обединетите нации во септември, изјави во средата премиерот Марк Карни, со што дополнително се зголемува притисокот врз израелската влада на премиерот Бенјамин Нетанјаху додека хуманитарната криза во Газа се влошува.
„Соработуваме со други за да ја зачуваме можноста за решение со две држави, за да не дозволиме фактите на терен – смртни случаи, населби, експропријации – да дојдат до точка каде што тоа повеќе не е можно“, рече Карни.
Карни изјави пред новинарите дека планираниот потег се темели на заложбата на палестинската власт да спроведе реформи, вклучително и длабоки промени во управувањето и одржување на општи избори во 2026 година, на кои Хамас „нема да има никаква улога“.
Канада долго време тврдеше дека ќе ја признае палестинската држава дури по завршувањето на мировните преговори со Израел. Но, Карни рече дека реалноста на теренот, вклучително и гладот кај граѓаните во Газа, значи дека „изгледите за палестинска држава буквално исчезнуваат пред нашите очи“.
Меѓу причините ги наведе и „широко распространетата закана од тероризмот на Хамас врз Израел“, забрзаната изградба на населби низ Западниот Брег и Источен Ерусалим, како и гласањето во Кнесетот со кое се повикува на анексија на Западниот Брег.
„Канада ја осудува фактот дека израелската влада дозволи катастрофа да се случи во Газа“, изјави Карни.
Најавата доаѓа по изјавата на Франција минатата недела дека ќе ја признае палестинската држава, како и еден ден по тоа што Велика Британија соопшти дека ќе го стори истото на Генералното собрание на ОН, доколку борбите во Газа – дел од палестинските територии под израелска окупација – не престанат до тогаш.
Овие најави од некои од најблиските сојузници на Израел ја одразуваат сè поголемата меѓународна загриженост поради сериозната хуманитарна криза во Газа.
Глобалната организација за следење на гладот предупреди дека во енклавата се одвива најлошото можно сценарио на глад.
Министерството за здравство во Газа во средата соопшти за уште седум смртни случаи поврзани со глад, вклучувајќи и двегодишно девојче со постоечки здравствени проблеми.
Владината канцеларија за медиуми во Газа, управувана од Хамас, наведе дека израелската армија во средата, за само три часа, убила најмалку 50 лица додека се обидувале да дојдат до храна од камиони со помош од ОН кои пристигнувале во северниот дел на Појасот Газа.Израел ја отфрли изјавата на канадскиот премиерИзраелското министерство за надворешни работи веднаш ја отфрли изјавата на канадскиот премиер.
„Промената на ставот на канадската влада во овој момент претставува награда за Хамас и им штети на напорите за постигнување примирје во Газа и рамка за ослободување на заложниците“, се вели во соопштението рано во четвртокот.Функционер од Белата куќа, кој зборувал под услов на анонимност, изјави за Ројтерс дека претседателот Доналд Трамп смета дека признавањето на палестинската држава е награда за Хамас.
„Како што изјави претседателот, признавањето на палестинската држава би значело наградување на Хамас, а тој не смета дека треба да се наградат. Затоа, тој тоа нема да го направи. Претседателот Трамп е фокусиран на тоа да им се обезбеди храна на луѓето во Газа“, се наведува.Функционерот не одговорил на прашањето дали САД биле однапред информирани за објавата на Карни.
Посебниот американски изасланик Стив Виткоф ќе отпатува во Израел во четврток за да разговара за следните чекори за решавање на ситуацијата во Газа, соопшти американски претставник.Трамп претходно оваа недела изјави дека очекува воспоставување на центри за исхрана за поголем број луѓе во таа енклава.
