Медот е познат уште од античко време како природен еликсир, но современите истражувања сè повеќе потврдуваат дека редовната консумација на оваа златна храна може да има специфични здравствени придобивки. Според текст објавен на порталот Health.com, медот е природен засладувач богат со антиоксиданси и пребиотици кои го поддржуваат варењето, го зајакнуваат имунитетот и придонесуваат за општата благосостојба.
Нутриционистите објаснуваат дека медот ги храни „добрите“ бактерии во цревата благодарение на пребиотиците кои ја поддржуваат здравата цревна флора. Кога рамнотежата на бактериите во цревата е добра, варењето, апсорпцијата на хранливите материи и отпорноста на инфекции се подобруваат. Со други зборови, дневната лажичка мед може да придонесе вашиот дигестивен систем да функционира подобро и постабилно. Освен што помага во варењето, медот е богат со флавоноиди и фенолни соединенија – моќни антиоксиданси кои го намалуваат оксидативниот стрес во телото, процес што ги оштетува клетките и го забрзува стареењето.
Експертите истакнуваат дека овие супстанции имаат посебен заштитен ефект врз мозочните клетки и можат да придонесат за зачувување на меморијата и менталната свежина. Ако понекогаш ви недостасува енергија, медот може да биде природен сојузник. Содржи природни шеќери и има низок гликемиски индекс, што значи дека не предизвикува скокови и падови на шеќерот во крвта како рафинираните засладувачи. Научните анализи покажуваат дека дури може да придонесе за подобра регулација на гликозата во крвта. Сепак, на луѓето со дијабетес им се препорачува да користат мед умерено и со согласност на лекар.
Кога имате кашлица, медот може да биде едноставен и ефикасен лек од кујната. Го премачкува грлото, ја смирува иритацијата и ја намалува потребата за кашлање, па дури и ви помага подобро да спиете. Некои истражувања покажуваат дека е поефикасен во овој поглед од одредени лекови што можат да се купат без рецепт.
Суровиот и манука медот се познати по своите антибактериски, антиинфламаторни и антимикробни својства. Редовната консумација може да му помогне на телото побрзо да се бори против вирусите и бактериите, намалувајќи го ризикот од настинка или грип.
И покрај сите предности, медот сепак останува – шеќер. Природен, поздрав и богат со хранливи материи, но сепак засладувач што треба да се користи умерено. Експертите потсетуваат: една лажичка дневно е доволна за да се почувствуваат неговите корисни ефекти, без претерување.
