Професорот на Правниот факултет во Белград, Миодраг Јовановиќ, предупредува дека сè додека актуелната власт е на чело на државата, институциите нема да ја извршуваат својата улога во полн капацитет и нема да обезбедат еднаквост пред законот, темелна вредност на секое демократско општество.
Говорејќи по повод комеморативниот собир во Нови Сад по повод годишнината од трагедијата на железничката станица, каде што падот на надстрешницата однесе 16 животи, Јовановиќ рече дека „највпечатлив бил бројот на граѓани кои, на најдостоинствен начин, им оддадоа почит на жртвите и испратија јасна порака дека мора да има одговорност“.
„Тоа не беше природна катастрофа, туку последица на човечка грешка, немарност и неказнивост,“ рече професорот, додавајќи дека година дена подоцна, никој не е изведен пред правдата, што само ја потврдува нефункционалноста и политичката зависност на институциите.
Според него, власта има цврста контрола над сите делови на системот, вклучувајќи го и правосудството, каде што денес се води „внатрешен судир меѓу оние кои се стремат кон професионализам и оние кои се однесуваат како продолжена рака на власта“.
„Во нашата историја, оваа власт на Александар Вучиќ ќе остане запаметена како една од најбесчестните,“ вели Јовановиќ. „Кога ќе се соочите со режим кој е подготвен на срамни постапки, единствениот одговор е трпение, организација и истрајност во отпорот.“
Тој додава дека единствениот демократски излез од кризата се изборите, особено во држава каде што „тие се одржуваат премногу често, без суштинска причина, само за да се одржи привид на демократски процес“.
Трн го интервјуираше лани проф. Миодраг Јовановиќ – „Студентите ни држат час по демократија“
Во екот на студентските протести и блокади, професорот Миодраг Јовановиќ беше еден од првите универзитетски професори кои јавно и недвосмислено им дадоа поддршка на студентите. Во разговор за Трн, Јовановиќ објасни зошто верува дека токму младите денес ја носат најважната лекција за целото општество.
„Ги гледам студентите како на некој кој со сето ова што го прави, на сите нас ни држи час – и ние со задоволство се согласуваме да бидеме тие кои го следат тој час,“ рече професорот со видлива гордост.
Тој, кој на Правниот факултет предава предмети поврзани со демократија, владеење на правото и уставност, вели дека факултетот деновиве живее по „поубави и почесни правила од кога било досега“.
„Студентите сега не само што зборуваат за демократија и за уставност, тие ја живеат. Она што го учат на предавањата, сега го применуваат во реалноста. Тоа искуство е болно, бидејќи произлезе од трагедија, но е истовремено и трансформативно – за нив, за универзитетот, и за целата земја,“ изјави Јовановиќ.
Тој нагласи дека барањата на студентите се „разумни, јасни и благородни“, бидејќи се однесуваат на правдата, еднаквоста пред законот и казнивоста на оние што ја злоупотребуваат власта. „Не постои повозвишена цел од оваа, да се бара држава во која законот важи за сите,“ додаде професорот.
Во својата изјава за Трн, Јовановиќ изрази огромна гордост кон своите студенти, посочувајќи дека она за кое тој со години зборува во предавалните, тие денес го спроведуваат преку блокади, протести и мирен отпор.
„Она што започна како универзитетски протест, веќе се прошири на средношколците, на синдикатите, на земјоделците… и јас искрено се надевам дека тој бран ќе продолжи и дека цела Србија ќе се разбуди,“ нагласи Јовановиќ.
Биографија
Миодраг Јовановиќ е српски правник, професор, музичар и писател. Редовен професор е на Правниот факултет во Белград, каде што предава Вовед во право и Малцински права, а на мастер студиите Општа теорија на државата и правото, Теории на субјективни права и Политички систем на Европската Унија.
Покрај академската кариера, Јовановиќ е познат и како вокалист на експерименталниот панк-рок бенд „Ништа али логопеди“ од Шабац, група која во 1990-тите го разби традиционалниот музички шаблон со својата мешавина од хумор, сатира и музичка еклектика.
Денес, неговиот ангажман во јавниот живот ја надминува академијата и уметноста, тој е гласен критичар на политичката злоупотреба на институциите и симбол на интелектуалниот отпор и моралната храброст во Србија.
