Нов извештај на Обединетите Нацц вели дека младите луѓе низ целиот свет би можеле да бидат клучен фактор за иднината на безбедноста на храната, економскиот раст и отпорноста на климатските промени.
Но,за да дојде до тоа, потребна е координирана глобална акција за да се ослободи нивниот потенцијал.
Премостувањето на јазот во вработеноста на младите во земјоделството би можело да ја зголеми глобалната економија за 1,4 проценти, со придобивка од околу 1,5 трилиони американски долари, според новиот извештај на Организацијата за храна и земјоделство на Обединетите нации (ФАО).
Извештајот насловен „Статусот на младите во земјоделско-прехранбените системи“, ја нагласува клучната улога на младите во трансформирањето на земјоделско-прехранбените системи за подобрување на безбедноста на храната, исхраната и економските можности.
Имено, речиси 85 проценти од младите луѓе ширум светот денес живеат во земји со ниски и средни приходи, каде што земјоделско-прехранбените системи се од суштинско значење за егзистенција. Подобрувањето на нивното вклучување во тие системи би можело да направи разлика од трилион долари во глобалната економија.
Извештајот навлегува во техничките и политичките иницијативи дизајнирани да создадат пристојни можности за работа, да ја подобрат безбедноста на храната и исхраната и да ја зголемат отпорноста на младите луѓе на шокови. Ги истакнува младите како клучни агенти на промени во земјоделскиот сектор, позиционирајќи ги како следната генерација производители, преработувачи, даватели на услуги и потрошувачи. Тие ќе се соочат со широк спектар на предизвици, вклучително и зголемување на производството на храна за растечкото население, замена на стареечката работна сила и прилагодување кон влијанијата од климатската криза, недостигот на вода и урбанизацијата.
„Извештајот за состојбата на младите во земјоделско-прехранбените системи дава навремена проценка заснована на докази за тоа како можат да се постигнат пристојни работни места и безбедност на храната за младите преку трансформација на земјоделско-прехранбените системи и како обучените млади можат да дејствуваат како катализатори за поширока трансформација на земјоделско-прехранбените системи“, пишува Кју Донгју, генерален директор на ФАО, во предговорот на извештајот.
Јакнење на младите
Во извештајот се наведува дека над 20 проценти од младите не се вработени, не се образуваат или не се обучуваат, при што младите жени имаат двојно поголема веројатност да се најдат во оваа категорија. Елиминирањето на невработеноста кај младите и обезбедувањето можности за вработување за млади на возраст од 20 до 24 години кои не се вработени, не се образуваат или не се обучуваат би можело да го зголеми глобалниот бруто домашен производ за 1,4 проценти, што е еднакво на 1,5 трилиони долари дополнителна активност со додадена вредност, при што околу 45 проценти од тоа зголемување произлегува од земјоделско-прехранбените системи.
Климатски шокови
Климатските екстремни настани и шокови претставуваат значителна закана, при што се проценува дека 395 милиони млади луѓе од руралните средини живеат на локации за кои се очекува да доживеат пад на земјоделската продуктивност, особено во традиционалните земјоделско-прехранбени системи и подсахарска Африка.
Извештајот дава детални податоци за демографијата на младите, што укажува дека 54 проценти живеат во урбани средини, со највисоки концентрации во Источна Азија. Спротивно на тоа, младите од руралните средини сочинуваат само 5 проценти од населението во индустриските земјоделско-прехранбени системи, што сигнализира потенцијален недостиг на работна сила доколку земјоделските кариери не се направат попривлечни. Многу млади од руралните средини живеат во области со висок потенцијал за земјоделска продуктивност, што претставува значителни можности за инвестирање во пристапот до пазарот и инфраструктурата.
