Израел изврши нови воздушни напади врз нуклеарни објекти во Иран, само неколку часа откако најави дека воената кампања ќе биде „ескалирана и проширена“. Според иранските власти, погодени се повеќе клучни постројки, но засега нема извештаи за радијациско истекување.
Иранската Организација за атомска енергија на Иран соопшти дека бил нападнат погон за преработка на ураниум во градот Ардакан, во провинцијата Јазд. Според нив, нападот не предизвикал ослободување на радиоактивни материи.
Државната агенција Фарс јави дека бил погоден и комплексот за тешка вода во Хондаб, кој е важен за функционирање на нуклеарни реактори. Дополнително, според ИРНА, нападнат е и погон за производство на „жолт колач“ (концентриран ураниум).
Израел најавува проширување на нападите
Израелската војска ИДФ соопшти дека цел на нападите биле воени и индустриски објекти „во срцето на Техеран“, поврзани со производство на балистички ракети и оружје.
Министерот за одбрана Израел Кац изјави дека Иран „ќе плати висока цена“ и предупреди дека нападите ќе продолжат и ќе се прошират на нови цели.
Во меѓувреме, сирените за тревога редовно се огласуваат во Израел, додека иранските ракети се пресретнуваат од израелската одбрана.
Притисок за прекин на војната
Ескалацијата доаѓа во момент кога Доналд Трамп тврди дека преговорите со Техеран напредуваат. САД наводно понудиле план од 15 точки за прекин на огнот, кој вклучува и откажување на Иран од контролата врз Ормуски теснец.
Сепак, паралелно со дипломатските напори, Вашингтон испраќа дополнителни воени сили во регионот, што отвора прашања дали се подготвува и за можно воено сценарио за контрола на клучниот поморски теснец.
Иран со закани и продолжување на нападите
Исламска револуционерна гарда (IRGC) ги повика цивилите на Блискиот Исток да се држат подалеку од американски воени позиции, додека Техеран најавува дека ќе продолжи со одмаздничките напади.
И покрај тврдењата на Доналд Трамп дека разговорите „одат добро“, Иран сигнализира дека нема намера да попушти без исполнување на сопствените услови за завршување на конфликтот.
