Нетанјаху ја обвини групата Хамас за „грубо кршење на примирјето“ постигнато пред три недели, но Хамас категорично ги негираше обвинувањата и изјави дека останува посветен на прекинот на огнот.
Според сведоци, израелските удари ги погодиле центарот на Газа, вклучувајќи го двориштето на болницата Ал-Шифа, како и населбата Сабра, делови од Кан Јунис и Деир ел-Балах. Најсилните експлозии биле забележани во Газа Сити, а според цивилната одбрана на Газа, досега се пријавени најмалку седум загинати и повеќе повредени.
Неколку часа претходно, израелски проектил погодил автомобил во Кан Јунис, при што загинале пет лица, а повеќе биле повредени. Според изворите на AFP, израелската армија започнала најмалку три воздушни напади, иако IDF сè уште нема објавено официјален коментар.
Групата Хамас преку соопштение објави дека нема никаква врска со нападот врз израелските војници во Рафа, кој го поттикнал новиот бран израелски напади. „Остануваме посветени на договорот за примирје,“ соопштија од организацијата, обвинувајќи ја израелската влада дека „измислува изговори за нови агресии“.
Нетанјаху претходно изјави дека Хамас го прекршил примирјето „со испраќање на посмртни останки кои не припаѓале на израелски заложник“, што дополнително ја вжешти ситуацијата.
Американскиот претседател Џеј Ди Венс оцени дека примирјето „сè уште се одржува, иако има мали судири тука и таму“. Тој изрази уверување дека „мирот што го воспостави претседателот ќе опстане и покрај инцидентите“.
Во меѓувреме, Иран објави дека бара казна од 170 милиони долари од сопственикот на товарниот брод MSC Aries, кој беше запленет во Персискиот Залив минатата година. Иранските власти тврдат дека бродот е во сопственост на израелскиот бизнисмен Ејал Офер, кој е обвинет за „финансирање на тероризам“.
Договорот за прекин на огнот меѓу Израел и Хамас беше постигнат на 10 октомври, но од самиот почеток двете страни меѓусебно се обвинуваат за прекршувања. Вечерашните напади се најжестоки откако примирјето стапи во сила, и повторно го доведуваат во прашање неговото опстојување.
Според израелските медиуми, се работи за „бран одмазднички напади“, додека меѓународните организации предупредуваат на опасност од ново разгорување на конфликтот во регионот.
Извор: The Guardian
