Иран воведе специјални безбедни поморски коридори за движење на бродови низ Ормускиот теснец, во координација со Исламска револуционерна гарда, во обид да го задржи под контрола еден од најважните енергетски правци во светот, додека безбедносната ситуација на Блискиот Исток останува крајно нестабилна.
Според иранските власти, воспоставени се јасно дефинирани влезни и излезни рути – бродовите што влегуваат во теснецот ќе се движат северно од островот Ларак, додека излезната рута оди јужно од истиот остров кон Оманското Море, при што сите пловила мора да се координираат со воените структури на Иран.
Во меѓувреме, израелскиот премиер Бенјамин Нетанјаху порача дека „прстот останува на обарачот“, нагласувајќи дека Израел е подготвен во секој момент да се врати во целосен конфликт, особено против Хезболах во Либан, кој според него не е опфатен со договорот за примирје.
Паралелно, шефот на дипломатијата на Иран, Абас Аракчи, испрати директна порака до САД дека мора да изберат меѓу вистински прекин на огнот или продолжување на војната преку Израел, нагласувајќи дека „двете не можат да постојат истовремено“.
Несогласувањата околу опфатот на примирјето дополнително ја комплицираат ситуацијата додека Белата куќа тврди дека Либан не е дел од договорот, Техеран инсистира дека прекинот на огнот важи „на сите фронтови“.
Дополнителен притисок создава и прашањето за иранската нуклеарна програма според Меѓународна агенција за атомска енергија, Иран располага со значајни количини збогатен ураниум, додека Доналд Трамп инсистира на негово предавање како клучен услов за долгорочен договор. Во исто време, од Пентагон порачаа дека САД го задржуваат правото на нови воени удари доколку проценат дека е загрозена безбедноста, што дополнително ја зголемува неизвесноста околу опстанокот на кревкото примирје.
Сите овие развои покажуваат дека, и покрај формалниот договор за прекин на огнот, регионот останува на работ на нова ескалација, со Ормускиот теснец како клучна геополитичка точка од која директно зависи глобалната економија и енергетската стабилност.
