Три пакистански танкери за нафта поминаа низ Ормутскиот теснец во изминатите десет дена, што укажува дека Иран можеби дозволува безбеден премин за некои нафтени пратки, според извори на превоз и податоци за следење на бродовите .
Извор од Пакистанската национална бродска корпорација (PNSC), кој сакаше да остане анонимен, потврди дека последниот танкер што поминал бил „Карачи“. Според него, „многу е веројатно“ дека безбедното поминување било „координирано со Иранците“.
Улогата на дипломатијата
Податоците на MarineTraffic покажуваат дека танкерот пловел низ теснец покрај брегот на Иран, во рамките на ексклузивната економска зона на Иран, во недела навечер. Тој емитувал сигнал од Системот за автоматска идентификација (AIS), „што укажува дека одредени пратки можеби добиваат договорен безбеден премин“, соопшти MarineTraffic.
Камар Чима, извршен директор на Институтот Санобер, тинк-тенк со седиште во Исламабад, за Си-Ен-Ен изјави дека „може безбедно да се претпостави“ дека Пакистан ги користел своите дипломатски канали за да организира премин за своите бродови со Иранската револуционерна гарда.
„Солидарност и поддршка“
Тој верува дека Иран „ги разбира економските проблеми на Пакистан“ и дека Исламабад веројатно не морал да прави отстапки поради „државната и социјалната поддршка што Иран ја ужива во Пакистан“.
Иран постојано нагласува дека теснецот е блокиран за сообраќај само од неговите непријатели и нивните сојузници. Неодамнешните изјави на официјални лица, исто така, ги потврдуваат добрите односи. Иранскиот министер за надворешни работи, Абас Арагчи, го пофали Пакистан на социјалната мрежа X во понеделник, изразувајќи „искрена благодарност“ за неговиот „силен израз на солидарност и поддршка“.
