Ирански дронови од типот Шахед денес го погодиле меѓународниот аеродром во Нахчиван – азербејџанскиот ексклав кој граничи со Иран, Турција и Ерменија.
Еден дрон го погодил терминалот на аеродромот, а втор паднал во близина на училишна зграда во селото Шекарабад. Двајца цивили се повредени.
Азербејџанското Министерство за надворешни работи го осуди нападот како кршење на меѓународното право и го повика иранскиот амбасадор на разговор, барајќи итно објаснување.
„Азербејџанската страна го задржува правото на соодветни одмаздни мерки”, стои во изјавата на Министерството.
Иранскиот заменик-министер за надворешни работи Казем Гарибабади ги негираше нападите врз соседните земји и изјави дека треба да го истражи случајот пред да даде официјален коментар.
Ова е прв напад на Иран врз територија на Кавказот откако започна поширокиот регионален конфликт. Меѓу земјите погодени од ирански дронови и балистички ракети се наоѓаат Бахреин, Кувајт, Катар, Саудиска Арабија, ОАЕ, Ирак и Јордан.
