Иранските власти упатија најсериозна закана досега кон Соединетите Американски Држави, предупредувајќи дека во случај на нов американски напад би можело да дојде до драматична ескалација на конфликтот. Според извештај на Financial Times, Техеран сигнализира промена на својата досегашна стратегија на „ограничена одмазда“, која имаше цел да избегне директна воена конфронтација со Вашингтон.
Главниот командант на иранските вооружени сили, генерал-мајор Абдолрахим Мусави, изјави дека претходната стратегија била насочена кон спречување ескалација, но дека „однесувањето на САД го променило пристапот на Иран“. Тој порача дека доколку Вашингтон „повтори грешка“, одговорот ќе биде тежок и одлучен.
Од симболична одмазда кон вистинска ескалација
Извори блиски до иранскиот режим тврдат дека Техеран повеќе нема да се задоволува со симболични напади, како што беше ракетирањето на американски бази во Ирак во 2020 година по убиството на генералот Солеимани. Наместо тоа, новата доктрина предвидува „реални трошоци“ за американските сили и интереси.
Според истите извори, Иран не посакува војна и се надева дека разговорите во Женева би можеле да доведат до нов нуклеарен договор. Сепак, официјалните лица порачуваат дека земјата попрво би влегла во конфликт отколку да капитулира пред американскиот претседател Доналд Трамп.
Иран предупредува дека во евентуален судир би можел да таргетира американски бази, воени бродови, па дури и стратешки важниот Хормушкиот теснец клучна поморска рута низ која минува голем дел од светската трговија со нафта.
Воена нерамнотежа и ризик од поширок конфликт
Аналитичарите надвор од Иран се скептични околу капацитетот на Техеран да ѝ нанесе сериозна штета на американската војска, која во моментов има значително засилено присуство на Блискиот Исток. Сепак, иранските извори тврдат дека балистичките ракети и беспилотните летала можат да ја намалат технолошката предност на противникот.
Особено загрижувачка е можноста за блокада на Хормушкиот Теснец, што би имало сериозни последици врз глобалните енергетски пазари и светската економија.
Нови правила на одмазда
Пораките од Техеран сугерираат дека повеќе нема да се прави разлика меѓу САД и Израел во евентуална одмазда – доколку едната страна нападне, одговорот би можел да ги вклучи и двете.
Во меѓувреме, претседателот Трамп го обвини Иран за „злокобни амбиции“ и предупреди дека иранските ракети претставуваат закана за американските бази. Иранските власти, пак, инсистираат дека нивната нуклеарна програма има исклучиво мирољубив карактер и дека нема да прифатат ограничувања што излегуваат надвор од меѓународните договори.
Засилениот тон од двете страни укажува на зголемени тензии и намален простор за дипломатска воздржаност, во момент кога Блискиот Исток повторно се наоѓа на раб на поширока ескалација.
