Иран го оцени како „непозитивен“ својот одговор на американскиот предлог за завршување на војната, изјави висок ирански функционер за Reuters, додавајќи дека Иран сè уште ги анализира условите.
Според истиот извор, одговорот на Иран бил доставен преку Пакистан за да биде пренесен до Вашингтон. Иранската државна телевизија Press TV објави дека Техеран ги смета американските услови за претерани и нагласува дека ќе стави крај на војната „кога тој ќе одлучи и под негови услови“.
Како клучно барање, Иран инсистира на признавање на суверенитетот над Ормуски теснец, нарекувајќи го тоа свое „природно и законско право“.
Во меѓувреме, на глобалните пазари се забележаа реакции: цените на нафтата паднаа, а берзите се стабилизираа, по информациите дека Соединетите Американски Држави испратиле план од 15 точки со цел ставање крај на конфликтот што трае веќе четири недели. Инвеститорите се надеваат на брзо смирување на кризата, која досега однесе илјадници животи и сериозно ја наруши глобалната енергетска стабилност.
Според три извори од кабинетот на израелскиот премиер Бенјамин Нетанјаху, безбедносниот кабинет бил информиран за предлогот, кој вклучува: отстранување на иранските резерви на високо збогатен ураниум, прекин на збогатувањето и ограничување на балистичката програма, како и запирање на финансирањето на регионалните сојузници.
