Животот станува сè поскап, а инфлацијата повторно го засилува притисокот врз граѓаните. Според податоците на Државниот завод за статистика, инфлацијата во март изнесува 4,9% во однос на истиот период лани, додека цените на мало пораснале за 3,4%.
Најголем удар има кај основните трошоци за живот. Храната и безалкохолните пијалаци се поскапи за 7,5%, што директно влијае на секојдневниот буџет на домаќинствата. Во споредба со февруари, трошоците за живот се зголемени за 0,7%.
Владата веќе очекуваше вакво движење, со проценка дека инфлацијата ќе се движи меѓу 4,5 и 5%. Премиерот Христијан Мицкоски најави дека се прават нови анализи и дека по Велигден ќе следуваат таргетирани мерки за стабилизација на цените.
Но, додека институциите подготвуваат решенија, синдикатите реагираат со најави за протести, предупредувајќи дека инфлацијата сериозно го „топи“ животниот стандард на работниците.
Дополнителен притисок се очекува и во земјоделскиот сектор. Производителите најавуваат дека зеленчук под 100 денари за килограм ќе биде сè поредок, додека вината ја префрлаат и врз трговците и врз зголемените трошоци.
Според пресметките, минималната потрошувачка кошничка од почетокот на годината е зголемена за 2.326 денари. За март таа изнесува 67.818 денари, а за семејства кои плаќаат кирија, месечните трошоци надминуваат и 83.000 денари.
Во вакви услови, експертите не очекуваат брзи и драстични решенија, особено поради сложените економски и геополитички околности.
