Инфлацијата во САД во март забрзала на 3,3 проценти на годишно ниво, што е јасен скок во однос на 2,4 проценти во февруари. Најсилниот удар дошол од енергенсите, пред сè од бензинот, чии цени пораснале за 21,2 проценти во однос на претходниот месец. Тоа е најголем месечен раст откако американските власти почнале да ја водат оваа статистика во 1967 година.
Скокот на цените на горивата бил клучен двигател на целото мартовско забрзување на инфлацијата. Според објавените податоци, токму бензинот учествувал со речиси три четвртини во месечниот раст на потрошувачките цени, додека поскапеле и авионските билети и облеката. Цените на храната, во меѓувреме, останале речиси непроменети во однос на февруари.
Ударот најсилно се чувствува кај домаќинствата што зависат од автомобилски превоз. Според светските медиуми просечната цена на галон гориво во Калифорнија достигнала 5,93 долари, додека националниот просек бил 4,16 долари. Тоа значи дека растот на цените веќе не е само статистика, туку директен притисок врз секојдневните трошоци на граѓаните.
Во исто време, таканаречената базична инфлација, која ги исклучува храната и енергијата, изнесувала 2,6 проценти и била нешто пониска од очекувањата. Дел од економистите поради тоа оценуваат дека главниот проблем засега е енергетскиот шок, а не целосно вкоренета нова инфлаторна спирала. Но предупредуваат и дека, ако енергијата остане скапа подолго време, ценовниот притисок може да почне да се прелева и во други сектори.
Новите податоци доаѓаат во момент кога пазарите веќе ги намалуваат очекувањата дека Федералните резерви брзо ќе почнат со намалување на каматните стапки. Иако дел од аналитичарите сè уште веруваат дека станува збор за привремен енергетски удар, мартовските бројки покажуваат дека американската економија повторно влегува во чувствителна зона во која цените, геополитиката и монетарната политика повторно силно се судираат.
