Американско-израелскиот напад врз Иран целосно го наруши авионскиот сообраќај низ Блискиот Исток, но и значително пошироко, речиси низ цела Азија. Поради обиколни рути на кои се принудени авионските превозници, се очекува цените на билетите за летовите кои воопшто ќе се реализираат, да пораснат драстично.
Затворен воздушен простор
Израел, Катар, Сирија, Иран, Ирак, Кувајт и Бахреин го затвориле својот воздушен простор, а нема летови ни над Обединетите Арапски Емирати.
Ова довело до затворање на аеродромите во Дубаи, Абу Даби и Доха и откажување на илјадници летови на главните блискоисточни авиокомпании, јавува The Guardian.
Огромна гужва на аеродромите
Три главни авиокомпании – Emirates, Qatar Airways и Etihad – обично опслужуваат околу 90.000 патници дневно кои минуваат низ овие чворишта. Дубаи е најпрометниот аеродром во светот за меѓународни летови.
Според Flightradar, во недела биле откажани повеќе од 3.400 летови на седум главни аеродроми на Блискиот Исток.
Emirates ги објави сите летови од и кон Дубаи откажани до понеделник во 15:00 часот по локално време.
Qatar Airways ќе продолжи со операции кога катарските власти ќе го прогласат повторното отворање на воздушниот простор како безбедно.
Etihad ги суспендираше летовите од и кон Абу Даби до понеделник до 02:00 часот.
Напади врз аеродроми
Меѓународниот аеродром во Дубаи и неговиот познат хотел Burj Al Arab биле погодени во иранската одмазда, при што биле повредени четири лица. На аеродромот Zayed во Абу Даби, биле регистрирани една смрт и седум повредени лица, според објави на X, кои подоцна беа избришани.
Воздушниот простор над Иран, Ирак, Кувајт, Израел, Бахреин, ОАЕ и Катар останал практично празен.
Глобални последици
Според FlightAware, повеќе од 18.000 летови биле одложени низ целиот свет, а над 2.350 откажани до сабота вечерта (GMT 22:30).
Авионските компании кои минуваат преку Блискиот Исток мора да ги пренасочат летовите заобиколувајќи го конфликтот, што го продолжува времето на летот и ги зголемува трошоците. Како резултат, цените на билетите би можеле брзо да пораснат доколку конфликтот продолжи.
Дополнителните летови ќе го оптоварат и контролата на воздушниот сообраќај во Саудиска Арабија, која можеби ќе мора да го успори сообраќајот за да го одржи безбедно.
Понатамошни ризици
Конфликтот помеѓу Авганистан и Пакистан би можел дополнително да го влоши воздушниот сообраќај над регионот, уште повеќе ограничувајќи ги коридорите за летови помеѓу Европа и Азија.
Ian Petchenik, директор за комуникации на Flightradar24, истакнува:
„Секоја ескалација на конфликтот помеѓу Пакистан и Авганистан која ќе резултира со затворање на воздушниот простор, ќе има драстични последици за патувањата помеѓу Европа и Азија.“
Air India ги откажа своите летови од Делхи, Мумбај и Амритсар кон големите градови во Европа и Северна Америка.
