Сеонаслов:
Нереални сцени од Иран: Илјадници луѓе на улиците додека околу нив паѓаат бомби и ракети, извикуваат „Бог е најголем“
Десетици илјади Иранци излегоа на улиците низ целата земја за да му дадат поддршка на новиот врховен лидер Мојтаба Хамнеи, во момент кога Иран е под напади од Израел и Соединетите Американски Држави.
Една од највпечатливите сцени е забележана во градот Исфахан. Илјадници граѓани се собраа на улиците и извикуваа „Алаху акбар“ (Бог е најголем), додека во нивна близина одекнуваа експлозии, а небото се полнеше со чад од непријателски ракети.
Според очевидци и снимки објавени на социјалните мрежи, атмосферата била истовремено напната и исполнета со силни емоции. Луѓето, и покрај опасноста од нови напади, останале на улиците за да покажат поддршка за новото раководство на Исламската Република.
Кој е Мојтаба Хамнеи?
Мојтаба Хамнеи, син на убиениот ајатолах Али Хамнеи, е назначен за наследник на својот татко на позицијата врховен лидер на Исламската Република. Неговото именување доаѓа по години во кои внимателно ги градел врските со Корпусот на исламската револуционерна гарда и го зацврстувал своето влијание во иранските институции, објави британската агенција Ројтерс.
Хамнеи (56) е духовник од среден ранг кој често се претставува како „чувар“ на политичката и верската мисла на својот татко. Тој се спротивставува на политичарите кои се залагаат за дијалог со Западот како дел од обидите да се ограничат нуклеарните амбиции на Иран.
Неговите блиски врски со Револуционерната гарда, идеолошката војска на Иран, му обезбедуваат значително влијание во политичкиот и безбедносниот апарат на земјата.
Мојтаба Хамнеи е роден во 1969 година во Машхад. Во текот на детството бил сведок на политичката мобилизација на својот татко заедно со ајатолахот Рухолах Хомеини против диктатурата на шахот Пахлави, наведува Ројтерс.
Тој учествувал во Иранско-ирачката војна (1980–1988), а подоцна студирал верски науки во семинариите во Кум. Досега ја носел титулата хоџатолеслам, ранг кој е под титулата ајатолах во хиерархијата на иранското свештенство.
