Израелските одбранбени сили тврдат дека од почетокот на операцијата во Либан биле изведени 26 бранови напади врз областа Дахије во Бејрут. Нападите биле насочени кон објекти кои Израел ги поврзува со Хезболах, додека групата возврати со предупредување до израелското население во близина на границата да се евакуира.
Според израелската војска, во текот на ноќта биле погодени командни центри на Хезболах и неколку повеќекатни згради кои, како што тврдат, се користеле за воени активности. Израелските воздухопловни сили, врз основа на разузнавачки информации, извршиле поширока серија воздушни напади во Бејрут, при што бил погоден и команден центар на извршниот совет на Хезболах, како и објект за складирање дронови.
Од ИДФ наведуваат дека пред нападите биле преземени мерки за намалување на ризикот за цивилното население, вклучително и претходни предупредувања и употреба на прецизна муниција.
Во меѓувреме, Хезболах преку медиумите објави предупредување до жителите на северен Израел. Во пораката се наведува дека населението во населбите на околу пет километри од границата треба да се евакуира, додавајќи дека израелските напади врз Либан и цивилната инфраструктура нема да останат без одговор.
Предупредувањето доаѓа по неколкудневната ескалација на судири меѓу Израел и Хезболах, кои повторно ја зголемија тензијата во регионот.
