И покрај малиот пад на интересот за патувања ова лето, Хрватска е сè уште на врвот на најбараните дестинации во Европа.
Според најновите податоци од Европската комисија за патувања (ETC), Хрватска се наоѓа високо на седмото место на листата составена од европски туристи, оставајќи ги зад себе дестинации како Португалија, Белгија и Обединетото Кралство.
Летната сезона 2025 година носи промени во навиките на туристите: патувањата можеби ќе бидат поретки, но ќе траат подолго и ќе бидат поскапи.
Повеќе од 70 проценти од Европејците планираат да патуваат во следните пет месеци, иако ова е мало намалување во споредба со минатата година. Во исто време, 40 проценти од нив планираат да поминат седум до дванаесет ноќи на одмор – што е значително повеќе отколку во претходните сезони. Буџетот за одмор исто така расте – секој трет турист планира да потроши помеѓу 1.500 и 2.500 евра по патување.
Претседателот на ETC, Мигел Санц, смета дека ваквите податоци укажуваат на стабилна побарувачка за туризам во Европа, и покрај економските и климатските предизвици. Тој ги повикува туристичките дестинации подобро да управуваат со зголемениот притисок врз популарните места и да го насочат вниманието и промоцијата кон помалку познати локации.
Иако Медитеранот сè уште привлекува голем број туристи (41% од сите испитаници), интересот за алтернативи малку расте.
Албанија и Босна и Херцеговина стануваат сè поатрактивни
Земји како Албанија и Босна и Херцеговина сè повеќе се избираат од европските патници, особено оние кои планираат подолг престој и имаат поголем буџет.
Климатските фактори сè повеќе влијаат врз планирањето на патувањата: повеќе од 80 проценти од Европејците ги земаат предвид климатските промени при изборот на дестинација.
Благата клима станува сè попожелна, додека регионите со екстремни температури сè повеќе се избегнуваат. Ова делумно го објаснува намалениот интерес за некои традиционални медитерански одморалишта.
Меѓу нациите што водат во планирањето патувања се Полјаците (80%) и Британците (79%), додека германските туристи – сè уште бројни, но некако порезервирани – со 70 проценти од оние што планираат летни одмори.
