Само еден ден по потпишувањето на тешко постигнатиот договор за прекин на огнот, стигаат вознемирувачки извештаи за егзекуции на луѓе од страна на палестинската милитантна група Хамас и за размена на оган со ривалските сили.
Медиумите пишуваат дека видеото објавено на X покажувало групна егзекуција на околу осум лица на плоштад во град јужно од градот Газа, додека тие биле опкружени со голема толпа на минувачи. Очевидци за германската агенција ДПА по телефон изјавиле, дека Хамас егзекутираните ги обвинува за соработка со израелската армија.
Потврда дека станува збор за Хамас
Би-Би-Си тврди дека има видео од јавна егзекуција извршена од вооружени лица на Хамас во Газа синоќа, но поради вознемирувачката содржина не ги објавува.
Видеата покажуваат неколку вооружени мажи како редат осум лица со врзани раце зад грб на јавен плоштад пред толпа. Иако Би-Би-Си не можеше да го потврди идентитетот на маскираните напаѓачи, некои од нив носат зелени ленти за глава, кои се поврзани со Хамас.
Неколку моменти подоцна, вооружените лица отворија оган и ги убија сите осум лица. Извици „Алаху Акбар“ – Бог е најголем на арапски – може да се слушнат од толпата додека напаѓачите стојат до телото.
Масакр на главниот пат во градот Газа
Користејќи ги ознаките видливи на снимката и споредувајќи го изгледот на улиците со јавните мапи, беше потврдено дека видеото е снимено на главната сообраќајница во градот Газа. Во соопштението, Хамас изјави, без никакви докази, дека погубените мажи биле „криминалци и израелски соработници“.
Внатрешно насилство избувна во Газа во последните денови, со извештаи за судири меѓу Хамас и сопернички кланови во рамките на појасот. Во најновото избувнување на насилство минатиот викенд, десетици беа убиени кога вооружени лица на Хамас се судрија со членови на семејството Дугмуш, моќен клан од Газа.
Во објава на Фејсбук, член на семејството Дугмуш ги нарече егзекуциите „криминален чин“.
Не е познато како Хамас избира кого да погуби, бидејќи нема фер судења, истакнува ДПА. На видеата, некои од жртвите очигледно биле мачени пред егзекуцијата, но автентичноста на снимката сè уште не е потврдена.
Според сè уште непотврдени извештаи, се одржале судења на кои членови на безбедносниот апарат на Хамас изрекле смртни казни.
Воведување ред со благослов на Трамп
Американскиот претседател Доналд Трамп вчера изјави дека Хамас добил зелено светло за внатрешни безбедносни операции во Појасот Газа, велејќи дека групата сака да „ги запре проблемите“ и „ние им дадовме дозвола за одреден временски период“.
Палестинската милитантна група, која мора да се разоружа и да престане да управува со Газа според предлогот на Трамп за прекин на војната, распореди внатрешни безбедносни сили во делови од крајбрежната енклава откако примирјето стапи на сила во петок, велејќи дека сака да го запре беззаконието и грабежите и да спречи безбедносен вакуум.
По делумното повлекување на израелската армија минатата недела и почетокот на примирјето во петок попладне, имаше и извештаи за вооружени престрелки меѓу единиците на Хамас и соперничките банди. Неколку десетици смртни случаи се пријавени од различни страни.
„Тие сакаат да ги спречат проблемите“
На прашањето на новинарите во авионот „Ер Форс Уан“ за извештаите дека Хамас се претставува како полиција и пука врз соперниците, Трамп одговори дека „тие сакаат да ги спречат проблемите и отворено зборуваат за тоа, а ние им дадовме дозвола веќе одреден временски период“.
„Имате приближно два милиони луѓе кои се враќаат во уништени згради и многу лоши работи можат да се случат. Затоа сакаме да бидеме сигурни дека е безбедно. Мислам дека ќе биде во ред. Којзнае“, рече Трамп.
Вчера во Египет беше потпишан мировен договор меѓу Израел и Хамас, со кој заврши двегодишната војна во Газа, под американско посредништво на претседателот Доналд Трамп.
