Настанот, кој се очекува да собере околу 200 гости, вклучувајќи ја ќерката на поранешниот американски претседател Доналд Трамп, Иванка, и нејзиниот сопруг Џаред Кушнер, како и бројни познати личности од светот на филмот, модата и бизнисот, е наречен „свадба на векот“.
Меѓутоа, дел од локалните жители го гледаат настанот како уште еден пример за дрската комодификација на прекрасниот, но кревок град, кој со години се бори со пренатрупан туризам и континуиран пад на населението.
Активистите од Гринпис Италија заедно со британската група „Сите го мразат Елон“ (All Hates Elon) развија џиновски транспарент на плоштадот Свети Марко, на кој беше прикажана насмевката на Безос со порака: „Ако можете да ја изнајмите Венеција за вашата свадба, тогаш можете и да платите повеќе данок“.
Локалната полиција интервенираше за да ги провери документите на активистите, пред тие да го закачат транспарентот.
„Проблемот не е свадбата, туку системот. Не е во ред еден богат милијардер да може да изнајми цел град за своето задоволство“, изјави Симона Абате, една од демонстрантите, за Ројтерс.
Градоначалникот на Венеција, Луиџи Бруњаро, и регионалниот гувернер Лука Заја ја бранеа одлуката, наведувајќи дека настанот ќе донесе значителна економска корист за локалните бизниси, вклучително и операторите на моторни чамци и гондоли кои управуваат со безбројните канали на градот.
Заја истакна дека прославите се проценуваат да чинат помеѓу 20 и 30 милиони евра (околу 23-34 милиони долари).
Безос, исто така, ќе донира значителни суми во добротворни цели, вклучително и милион евра за „Корила“ — академски конзорциум што го проучува екосистемот на венециските лагуни, објавија во недела италијанскиот весник „Кориере дела Сера“ и новинската агенција АНСА.
Порано овој месец, транспаренти против свадбата беа закачени на камбанаријата на Свети Марко и на познатиот мост Риалто, а локалните жители најавија мирни блокади настанот, истакнувајќи дека Венеција има потреба од повеќе јавни услуги и домување, а не од ВИП гости и прекумерен туризам.
Точните датуми и локации на раскошната свадба се држат во тајност, но се очекува прославата да трае три дена, веројатно околу 26 и 28 јуни.
